न्यायाधीशले घुस खाएकाे अभिव्यक्ति दिएका कोशीका मन्त्री राजभण्डारीविरुद्ध अवहेलना मुद्दा दायर

१२ असार, विराटनगर । कोशी प्रदेशका सामाजिक विकास मन्त्री बुद्धिकुमार राजभण्डारीविरुद्ध उच्च अदालत विराटनगरमा मुद्दा दायर भएको छ ।

मन्त्री राजभण्डारीविरुद्ध अधिवक्ता उद्धवचन्द्र घिमिरे र उच्च अदालत विराटनगरका रजिस्टार जितेन्द्रबाबु थपलियाले बुधबार अवहेलना मुद्दा दर्ता गरेका हुन् । प्रदेश खेलकुद बोर्डको सदस्यसचिव हंशराज वाग्लेले दायर गरेको रिटको सुनुवाइ गर्दा न्यायाधीशले घुस खाएको आरोप लगाएका थिए ।

मन्त्री राजभण्डारीले यही आइतबार विराटनगरको शिक्षादीप कलेजमा आयोजित कार्यक्रममा न्यायाधीशले घुस खाएको सार्वजनिक अभिव्यक्ति दिएका थिए । मन्त्री राजभण्डारीविरुद्ध अदालतको अवहेलना कसुरमा मुद्दा दायर भएको उच्च अदालतका सूचना अधिकारी ओम सुवेदीले जानकारी दिए ।  

अदालतमा विचाराधीन मुद्दामा अदालत र न्यायाधीशको मानहानी हुने गरी अभिव्यक्ति दिएर अदालतको अवहेलना गरेको जनाउँदै त्यसमा एक वर्ष कैद र दश हजार जरिवानाको माग दाबी गरिएको छ ।

गएकाे जेठ ३ मा बसेको कोशी प्रदेश मन्त्रिपरिषद् बैठकले बोर्डका सदस्यसचिव वाग्लेलाई बर्खास्त गरेको थियो । उच्चले बर्खास्त निर्णय कार्यान्वयनमा उच्च अदालत विराटनगरका परेको मुद्दामा न्यायाधीश कृष्णकमल अधिकारीको इजलासले अल्पकालका लागि रोक लगाउने र निर्णयको प्रतिलिपि झिकाउने आदेश दिएको थियो ।

त्यसपछि जेठ २२ गते न्यायाधीशद्वय कृष्णकमल अधिकारी र राजनप्रसाद भट्टराईको संयुक्त इजलासले न्यायाधीश इजलासको आदेशलाई निरन्तरता दिने आदेश दिएको थियो । आदेशसँगै वाग्ले काममा फर्किने बाटो खुला भएको छ । खसलापछि मन्त्रीले आक्रोशपूर्ण अभिव्यक्ति दिएको ठानिएको छ ।