प्रधानमन्त्रीले जवाफ दिएपछि संसदबाट बजेट आजै पास गराउने सरकारको तयारी

१३ असार, काठमाडौं । प्रतिनिधिसभाको बैठक बस्दैछ ।  बिहान ११ बजे बोलाइएको बैठकमा विनियोजन विधेयक माथिको छलफल जारी रहनेछ । सोही क्रममा विनियोजन (बजेट) विधेयक २०८० माथि उठेका प्रश्नको जवाफ प्रधानमन्त्री पुष्पकमल दाहाल प्रचण्डले दिने छन् । 

जसअनुसार प्रधानमन्त्री तथा मन्त्रिपरिषदको कार्यालय, उपराष्ट्रपतिकाे कार्यालय, राष्ट्रिय योजना आयोगलगायतका कार्यालयमा छुटाइएको बजेटमाथि जवाफ दिने कार्यक्रम रहेको छ । प्रधानमन्त्रीले जवाफ दिएपछि आजै बजेट पास गराउने सरकारको तयारी छ । बजेटका पक्षमा मतदान गर्न कांग्रेस र माओवादीले ह्वीप जारी गरिसकेका छन् । 

मंगलबारको  बैठकमा भने भूमि व्यवस्था, सहकारी तथा गरिबी निवारण मन्त्रालय, अर्थ मन्त्रालय, शिक्षा, विज्ञान तथा प्रविधि मन्त्रालय, कानुन, न्याय तथा संसदीय मामिला मन्त्रालय र कृषि तथा पशुपन्छी विकास मन्त्रालयको विनियोजन विधेयक २०८० अन्तर्गत विभिन्न शीर्षकहरूमा सांसदले उठाएका प्रश्नहरूको सम्बन्धित मन्त्रीले जवाफ दिएका थिए ।