मलेसियामा अलपत्र नेपाली मजदुरबारे सांसद पैडेलले गराए सरकारको ध्यानाकर्षण

१३ असार, काठमाडौं । नेपाली कांग्रेसका सांसद प्रदीप पौडेलले मलेसियामा अलपत्र परेका नेपाली श्रमिकहरुको उद्धारका लागि सरकारको ध्यानाकर्षण गराएका छन् ।

प्रतिनिधिसभाको बुधबारको बैठकमा आकस्मिक समयमा बोल्दै नेपालका विभिन्न म्यानपावर कम्पनीले रोजगारका लागि मलेसियामा पठाएका रोजगारदाता कम्पनीले काम नदिई अलपत्र पारेको र अहिले भोकभोकै बस्न बाध्य भएको भन्दै तत्काल उद्धार गरी नेपाल फिर्ता ल्याउने व्यवस्था गर्न माग गरे । साथै गलत तरिकाले उनीहरुलाई मलेसिया पुर्याउने म्यानपावर कम्पनीमाथि तुरुन्त कारवाहीको दायरामा ल्याउन माग गरे । 

बत्तिसपुतलीको मोभिरा र सामाखुशी न्यूक्यापिटल म्यानपाव कम्पनीले मासिक ५८ हजार नेपाली रुपैयाँ तलब पाउने सम्झौता गरी मलेसिया पठाएको पाइएको छ । हाल मलेसियामा ४४ कामदार ३२ दिनदेखि अलपत्र परेका छन् । उनीहरु एउटै कोठामा कोचिएर बस्न विवश भएको र खानेपानीको रुपमा ट्वाइलेटको पानी खान बाध्य भएको पीडित उनीहरुले सामाजिक संजालमा सार्वजनिक गरेका छन् ।