संसदमा ‘आर्थिक विधेयक २०८०’ पेस, छलफल जारी

१३ असार, काठमाडौं । अर्थमन्त्री डा. प्रकाशशरण महतले प्रतिनिधिसभाको बैठकमा ‘आर्थिक विधेयक २०८०’ पेस गरेका छन् । आगामी आर्थिक वर्ष २०८०/८१ का लागि ल्याइएको बजेट कार्यान्वयनका लागि विधेयक पेस गरेका हुन् ।

विधेयकमाथि सांसदहरुले धारणा राख्ने क्रम जारी छ । सांसद अमरेशकुमार सिंहले सरकारले साना क्षमताका विद्युतीय गाडीमा धेरै र ठूलो क्षमताका गाडीमा थोरै कर लगाउने लिएको भन्दै परिवर्तन गर्न माग गरे । चुरोटमा ७५ प्रतिशतभन्दा बढी कर लगाउन नपाइने विश्व स्वास्थ्य सगठनको प्रावधानलाई पालना गर्नुपर्ने बताए ।

सांसद प्रेम सुवालले निजी क्षेत्रबाट संचालित शिक्षा र स्वास्थ्य संस्थामाथि कर लगाउनुको साटो दुवै क्षेत्रलाई सरकारले जिम्मा लिएर नागरिकलाई राहत दिनुपर्ने बताए । सांसद सन्तोष परियारले सरकारले गरिबीमा परेका नागरिकलाई कर छुट दिने व्यवस्था ल्याउन सुझाव दिए ।