पशुपतिनाथको जलहरीबाट हटाइयो पूर्वराष्ट्रपति भण्डारी र केपी ओलीको नाम

१४ असार, काठमाडौं । पशुपतिनाथको मन्दिरको जलहरीबाट पूर्व राष्ट्रपति विद्यादेवी भण्डारी र केपी शर्मा ओलीको नाम हटाइएको छ । सुनको जलहरी बनाउँदा भण्डारी राष्ट्रपति र ओली प्रधानमन्त्री थिए । यसैले उनीहरूको नाम राखिएको थियो । 

जलहरीको सुत तौल गर्ने क्रममा भण्डारी र ओलीसहित १३ जनाको नाम हटाइएको हो ।  संस्कृति, पर्यटन तथा नागरिक उडड्यनमन्त्री सुदन किराँतीको निर्देशनमा भण्डारी र ओलीसहित १३ जनाको नाम जलहरीबाट हटाइएको हो । जलहरी प्रकरणपछि अख्तियारले सुनको नापजाँच गरेपछि जलहरीमा लेखिएको नाम हटाइएको बताइएको छ । 

मन्त्री किराँतीले जलहरीमा नाम लेखाउनु पनि भ्रष्टाचार गर्नु भएको भन्दै यसरी नाम लेख्दै जान असम्भव भएकाले हटाउन निर्देशन दिएका थिए । अख्तियार दुरुपयोग अनुसन्धान आयोगले पशुपतिनाथको जलहरीको सुन निकालेर तौल लिएको छ ।

जलहरी जोख्दा १०७.४६८७ किलोग्रामको पाइएको छ । जलहरीको नापतौल तथा शुद्धता परीक्षण गर्दा १०७.७६ किलोग्राम हुनुपर्नेमा १०७.४६८७ किलोग्राम भएको पाइएको छ । राति सवा एक बजेसम्म सुनको तौल लिइएको थियो ।