एक महिनामै यसरी घट्यो बैंकहरूको बेस रेट

१४ असार, काठमाडौं । नेपाल राष्ट्र बैंकले पछिल्लो समय बैंक तथा वित्तीय संस्थाले आउने महिनाको लागि त्यसअघिका हरेक तीन महिनाको औसत अनुसार आधार दर तय गर्न सक्ने व्यवस्था गरेको छ । यसअघि हरेक तीन-तीन महिना मात्रै कर्जामा लाग्ने आधार दर परिर्वतन हुने गर्थ्यो । अब भने हरेक महिना पछिल्ला तीन महिनाको आधार दरको औसत लिएर तय गरिन्छ ।

एक महिनाको अवधिमा वाणिज्य बैंकहरुको औसत आधार ०.१० प्रतिशतले घटेको छ । बैंकहरुले सार्वजनिक गरेको विवरण अनुसार वैशाखसम्म तीन महिनाको औसत आधार दरको तुलनामा जेठसम्म यस्तो औसत आधार दर मात्रै ०.१० प्रतिशतले घटेको हो । बैंकहरुको पछिल्लो तीन महिनाको औसत आधार दर (चैत, वैशाख र जेठ) को १०.३४ प्रतिशतमा आएको छ । फागुन, चैत र वैशाखको औसत आधार दर १०.४४ प्रतिशत थियो ।

यस अवधिमा तीन वाणिज्य बैंकहरुको औसत आधार दर एकल अंकमा रहेको छ । एकल अंकमा आधार दर हुनेमा राष्ट्रिय वाणिज्य बैंक, स्टाण्डर्ड चार्टर्ड र नेपाल बैंक रहेका छन् । सबैभन्दा कम औसत आधार दर राष्ट्रिय वाणिज्य बैंकको ८.२४ प्रतिशत छ । स्टाण्डर्ड चार्टर्डको ९.२९ प्रतिशत र नेपाल बैंकको ९.५५ प्रतिशत औसत आधार दर रहेको छ । बेस रेटमा केही प्रतिशत प्रिमियम थप गरेर बैंकहरुले कर्जा दिने गर्छन् । त्यसैले बेस रेट बढ्दा ब्याजदर पनि बढ्दै जान्छ भने बेस रेट घट्दा ब्याजदर पनि घट्दै आउँछ ।