माओवादी केन्द्रले कोशीमा आफ्नै नेतृत्वमा सरकार गठन गर्न पहल गर्ने

१४ असार, मोरङ । कोशी प्रदेशसभामा विपक्षी दल नेकपा (माओवादी केन्द्र)ले आफ्नै नेतृत्वमा सरकार गठन गर्न पहल लिने निर्णय गरेको छ । पार्टीको संसदीय दलको बैठकले आज यस्तो निर्णय गरेको हो ।

बैठकले मुख्यमन्त्री हिकमतकुमार कार्कीले राखेको विश्वासको मतको प्रस्तावको विपक्षमा मतदान गर्ने निर्णय गरेको छ । मुख्यमन्त्री कार्कीले आज बस्ने प्रदेशसभामा विश्वासको मत लिने प्रस्ताव पेस गर्ने तयारी गरेका छन् ।

गएको जेठ १६ गतेयता फरकफरक मितिमा जसपा र माओवादी केन्द्रले समर्थन फिर्ता लिएपछि कार्की अल्पमतमा परेका छन् । संवैधानिक व्यवस्था अनुसार असार १६ गतेभित्र प्रदेशसभाबाट विश्वासको मत लिनुपर्न व्यवस्था छ ।

जसपा, स्वतन्त्र, राप्रपा र माओवादी केन्द्रको समर्थनमा एमालेबाट मुख्यमन्त्री बनेका कार्कीसँग एमालेका ४० र राप्रपाका ६ गरी ४६ सदस्यको समर्थन छ । ९३ सदस्य रहेको कोशी प्रदेश सरकार गठनका लागि ४७ मत आवश्यक पर्छ । माओवादी केन्द्रले कांग्रेस, एकीकृत समाजवादी, जसपा र सभामुखसहितको ४७ मत पुर्याएर सरकार गठन गर्ने योजना बनाएको छ ।