आज धान दिवस : कृषिमन्त्री भुसाल रोपाइँमा सहभागी, काठमाडाैं उपत्यकामा नयाँ मेशिनको प्रयोग

१५ असार, ललितपुर । कृषि तथा पशुपन्छी विकास मन्त्री वेदुराम भुसाल शुक्रबार धान रोपाइँमा सहभागी भएका छन् । नेपाल कृषि अनुसन्धान परिषद् नार्कस्थित राष्ट्रिय बाली विकास केन्द्रको परिसर खुमलटारमा आयोजित रोपाइँ महोत्सवमा मन्त्री भुसाल सहभागी भएका हुन् ।

कृषि विभागले आयोजना गरेको महोत्सवमा मन्त्री भुसालले खुमल १० नामक धान रोपाइँ गरेका छन् । उनले सुरुमा हातले र पछि राइस ट्रान्सप्लानरले रोपाइँ गरेका छन् । एक बिघा जमिनमा २० मिनेटमा रोपाइँ गर्न सकिने मेसिनमा चढेर मन्त्री भुसालले रोपाइँ गरे । 

यस प्रकारका मेशिन प्रयोग भएको काठमाडौं उपत्यकामा संभवतः पहिलोपटक हो । यसअघिदेखि तराईका जिल्लाहरु झापा, चितवन नवलपरासी, बर्दिया लगायतमा किसानले प्रयोग गर्दै आएका छन् ।

राष्ट्रिय बाली विकास केन्द्रका प्रमुख वरिष्ठ बाली विज्ञ टीका कार्कीका अनुसार रोपाइँमा मेसिनले मध्य पहाडका सम्म खेतका गरामा रोपाइँ गर्न सकिनेछ । रोपाइँमा स्थानीय, कर्मचारी तथा राजनीतिक दलका नेता कार्यकर्ताहरु सहभागी भएका छन् ।

यसअघिदेखि तराईका जिल्लाहरु झापा, चितवन नवलपरासी, बर्दिया लगायतमा किसानले प्रयोग गर्दै आएका छन् ।

सरकारले हरेक वर्ष असार १५ मा राष्ट्रिय धान दिवस मनाउँदै आएको छ । यद्यपि सरकारले मुलुकलाई कृषि प्रधान देश भनेर घोषणा गरेको दशकौं भएपनि वार्षिक ४४ अर्ब रुपैयाँभन्दा बढी मूल्यको चामल आयात हुँदै आएको छ ।