ललितानिवास प्रकरणका ३ अभियुक्तको बन्दी प्रत्यक्षीकरणको रिट न्यायाधीश चुँडालको इजलासमा

१५ असार, काठमाडौं । बालुवाटारको ललितानिवासको जग्गा हिनामिना प्रकरणमा पक्राउ परेका ३ जनाको बन्दी प्रत्यक्षीकरणको रिट निवेदनमा सर्वोच्च अदालतमा सुनुवाइ हुने भएको छ । सुनुवाइका लागि न्यायाधीश कुमार चुँडालको एकल इजलासमा पेसी तोकिएको छ । 

प्रहरीको न्यायिक हिरासतमा रहेका भक्तपुरको तत्कालीन मालपोत कार्यालय प्रमुख एवं पूर्व निर्वाचन आयुक्त सुधीरकुमार शाह, भाटभटेनी सुपरमार्केटका सञ्चालक मीनबहादुर गुरुङ र डिल्लीबजारका मालपोत कार्यालयका पूर्व कर्मचारी धर्मप्रसाद गौतमले आफूहरूलाई गैरकानुनी रूपमा पक्राउ गरी गैर न्यायिक रूपमा हिरासतमा राखेकाे भन्दै रिहाइकाे माग गर्दै बुधबार सर्वोच्चमा रिट दायर गरेका थिए । 

उनीहरूलाई प्रहरीको केन्द्रीय अनुसन्धान ब्यूरो (सीआईबी) ले गत मंगलबार पक्राउ गरेको थियो । उनीहरूलाई जिल्ला अदालतले बुधबार मात्र ७ दिन हिरासतमा राख्न अनुमति दिएको छ । 

विसं २०४९ देखि २०६९ सम्ममा सरकारको स्वामित्वमा रहेको बालुवाटारस्थित ललितानिवासको १४३ रोपनी जग्गा विभिन्न व्यक्तिका नाममा नामसारी भएको फेला परेको थियो ।