कोशी प्रदेशसभाको बैठक सुरु, मुख्यमन्त्रीको विश्वासको मत प्रस्तावलाई मतदानबाट टुंग्याइँदै

१५ असार, काठमाडौं । कोशी प्रदेशसभाको बैठक सुरु भएको छ । बिहीबार शुरु भएको अधिवेशन अन्तर्गत आज दोस्रो बैठक बसेको हो । बैठकमा बिहीबार मुख्यमन्त्रीले पेस गरेका विश्वासको मत लिनेसम्बन्धी प्रस्तावलाई मत विभाजनबाट टुंग्याउने कार्यसूची रहेको छ । 

प्रस्ताव हिजै टुंगोमा पुर्याउने कार्यासूची भएपनि पनि कार्की र अन्य मन्त्रीहरु बैठक छाडेर निस्किएपछि रोकिएको थियो । आजको बैठकमा कार्कीले पेस गरेका विश्वासको मतको प्रस्तावमा बिहीबार दलहरूले उठाएका प्रश्नको जवाफ दिने कार्यक्रम छ । त्यसपछि मत विभाजनबाट प्रस्तावको टुंगो लगाउने कार्यसूची छ । कार्कीले विश्वासको मत पाउने संभावना शून्यप्रायः छ । ४७ मत रहेका विपक्षी दल कांग्रेस, माओवादी केन्द्र, एकीकृत समाजवादी र जसपाले विश्वास मत नदिने घोषणा गरिसकेका छन् । एक मत रहेको जसपाले प्रस्तावको पक्ष वा विपक्षमा मत नदिई तटस्थ बस्ने बताएको छ । 

९३ सदस्य रहेको कोशी प्रदेशमा सरकार गठनका लागि ४७ मत आवश्यक पर्छ । जसपाले कुनै पक्ष नलिने भएपछि विपक्षीहरुले पनि सरकार गठन सक्ने अवस्था देखिँदैन । जसपाले प्रदेशको कोशी नाम परिवर्तन गर्ने विषयमा उभिने पक्षलाई मतबारे सोच्न सकिने बताउँदै आएको छ । एमाले हाल कायम रहेको कोशी नामबाट पछाडि नहटने अडानमा छ । मुख्यमन्त्री कार्की एमालेका हुन् ।