यू–१६ इस्ट जोन कप क्रिकेटमा नेपाल समूह विजेता

१५ असार, काठमाडौं । एसीसी पुरुष यू-६ इस्ट जोन कप क्रिकेट प्रतियोगितामा नेपाल समूह ‘ए’ बिजेता बनेको छ । शुक्रबारको खेलमा घरेलु टोली मलेसियालाई ८४ रनको फराकिलो अन्तरले हराउँदै समूह बिजेता बनेको हो ।

जितसँगै नेपाली टोली प्रतियोगिताको सेमिफाइनलमा पुगेको छ । समूहगत चरणको अन्तिम खेलमा नेपालसँग पराजित भएको घरेलु टोली मलेसिया भने उपविजेताका रुपमा सेमिफाइनलमा पुग्यो । 

शुक्रबारको खेलमा टस जितेर पहिलो ब्याटिङ रोजेको नेपालले ३३.४ ओभरमा अलआउट हुनुअघि १८३ बनाएको थियो । जवाफी ब्याटिङमा ओर्लिएको मलेसियाले भने ३०.५ ओभरमै अलआउट हुनुअघि ९९ रनमात्र बनाउन जोड सफल भयो । नेपालको जितमा बलरहरुले उत्कृष्ट प्रदर्शन गरेका थिए । 

नेपालका लागि नवौं नम्बरका ब्याट्सम्यान अशोक धामीले अर्धसतकीय पारि खेले । उनले ५२ रन बनाए । आक्रामक रुपमा प्रस्तुत भएका अशोकले केवल ३६ बलको सामना गरी पाँच छक्का र तीन चौका प्रहार गरे । ओपनर ब्याट्सम्यान सूर्यान्सु कोइराला २९ रनमा पेभेलियन फर्किए । उनले २६ बलको सामना गरी पाँच चौका हिर्काएका थिए । 

अर्का ओपनर निरजकुमार यादव आठ रन र दीपुकुमार १५ रनमा आउट भए । प्रतिक भट्टराई चार रनमै आउट भए भने नरेन भट्टले २९ रन बनाए । सन्तोष यादव र आशिष लुहारले खाता सम्म खोल्न सकेनन् । कप्तान अभिषेख तिवारी चार रन जोडदा कीर्तिक कामतले १६ रन थपे । 

प्रतिक पोखरेलले अविजित दुई रन बनाए । आशोक धामी र नरेनबीच ३४ बलमा ४५ रनको साझेदारी गरे । भ्रमणकारी टोली नेपालले अतिरिक्त रुपमा २४ रन पाएको थियो । 

जवाफी ब्याटिङमा ओर्लिएको मलेसियालाई नेपाली बलरले दबाबमा राखेर खेले । अशोक धामी एक्लैले चार विकेट लिए । अर्का बलर अभिषेख तिवारीले तीन विकेट लिए । सन्तोष यादवले दुई र कीर्तिक कामतले एक विकेट लिए । अशोक म्यान अफ दी म्याच पनि घोषित भए ।