भ्रष्टाचारका फाइल खोल्न थालेपछि एमाले आत्तिएर सरकार ढाल्ने खेलमा लागेको हो: मन्त्री गुरुङ

१५ असार, काठमाडौं । नेपाली कांग्रेसका उपसभापति एवं कानुन, न्याय तथा संसदीय मामिला मन्त्री धनराज गुरुङले सरकारले ठूला भ्रष्टाचारका फाइल खोल्न थालेपछि नेकपा एमाले आत्तिएर सरकार ढल्छ भन्दै अनेक षडयन्त्र र जालझेलको खेलमा लागेको बताएका छन् । उनले एमालेकाे चाहना र चलखेलले वर्तमान सत्ता गठबन्धनमा कुनै प्रभाव नपर्ने बताएका छन् । 

पार्टी केन्द्रीय कार्यालय सानेपामा शुक्रबार आयोजित प्रशिक्षण कार्यक्रमलाई सम्बोधन गर्दै मन्त्री गुरुङले एमालेमा सत्तामा जाने भोक जागेकाले यस्तो षडयन्त्रमा लागेको बताए । उनले भोको स्यालले श्राप दिँदैमा हात्ती नमर्ने भन्दै एमालेको चाहनाले गठबन्धनको उद्देश्यमा परिवर्तन नआउने बताए । 

उनले भने, अहिले गठबन्धनको सरकार ढल्छ भन्ने पनि सुनिएको छ, ठूलो भ्रष्टाचारको फाइल खोल्दा विभिन्न हल्ला फिँजाइएको छ । यो भनेको भोकाएको स्यालले हात्ती मरोस् भनेर सराप दिए जस्तै हो । स्यालको सरापले हात्ती मर्दैन । अहिलेको सरकार ढालेर अर्को बनाउने भनेर एमालेले चलाएको हल्ला पनि यस्तै हो ।’

वर्तमान सरकार सुशासन दिने र भ्रष्टाचार निमिट्यान्न बनाउने कामबाट पछि नहट्ने उनले बताए । ‘सरकार भ्रष्टाचारका ठूला काण्डहरूको निष्पक्ष छानबिन गरी मुलुकलाई सुशासन दिने काममा लागेको छ । हामी नेपाली जनतालाई भ्रष्टाचारको भुंग्राेबाट निकाल्ने काममा लागेका छौ, यो नै गठबन्धन सरकारको ध्येय हो । एक पछि अर्को भ्रष्टाचारको काण्ड छानबिन गरी हामी सुशासन दिनेछौँ,’ उनले भने । सुशासनपछि मात्रै विकास निर्माणले गति लिने उनको भनाइ छ ।