पक्राउ पुर्जी बोकेर अख्तियारका पूर्व प्रमुख दीप बस्न्यात खोजी गर्दै प्रहरी

१५ असार, काठमाडौं । प्रधानमन्त्रीको सरकारी निवास बालुवाटार स्थित ललितानिवास जग्गा हिनामिना प्रकरणमा अख्तियार दुरुपयोग अनुसन्धान आयोगका पूर्व प्रमुख आयुक्त दीप बस्न्यातविरुद्ध पक्राउ पुर्जी जारी भइसकेको छ । अहिले पक्राउ पुर्जी बोकेर प्रहरीले बस्न्यातको खोजी गरिरहेको छ । 

काठमाडौं जिल्ला अदालतले बस्न्यातलाई पक्राउ गर्न प्रहरीको केन्द्रीय अनुसन्धान ब्युरो (सीआईबी) लाई अनुमति दिइसकेको छ । यसअघि अख्तियार दुरुपयोग अनुसन्धान आयोगले बस्न्यातविरुद्ध विशेष अदालतमा भ्रष्टाचार मुद्दा दायर गरेको थियो । सर्वोच्च अदालतको आदेशले उनी २४ वैशाख २०७८ मा पाँच लाख धरौटीमा रिहा भएका थिए । पुर्जी जारी हुनु पहिल्यैदेखि बस्न्यात फरार छन् ।

सोही प्रकरणमा केही दिनअघि पक्राउ परेका भाटभटेनी सुपरमार्केटका सञ्चालक मीनबहादुर गुरुङ, पूर्व निर्वाचन आयुक्त सुधीर शाह, धर्मप्रसाद गौतमसहित ४ जनामाथि सीआईबीले हिरासतमा लिएर अनुसन्धान गरिरहेको छ । 

हिरासतमा रहेकै बेला उनीहरूले आफूहरूलाई गैरकानुनी रुपमा हिरासतमा राखेको भन्दै रिहाई गर्न वारेसनामा मार्फत सर्वोच्च अदालतमा रिट दायर गराइसकेका छन् । रिटमा आज न्यायाधीश कुमार चुँडालको एकल इजलासमा सुनुवाइ भइसकेको छ । आदेश आउने क्रममा रहेको छ ।