शरणार्थी प्रकरणमा जेल परेका सानु भण्डारी र केशव दुलाललाई नख्खु जेल सारियाे

१५ असार, काठमाडौं । नक्कली भुटानी शरणार्थी प्रकरणमा ठगी, कीर्ते, संगठित र राज्यविरुद्धको अपराध मुद्दामा पुर्पक्षका लागि केन्द्रीय कारागार सुन्धारामा रहेका सानु भण्डारी र केशव दुलाललाई केन्द्रीय कारागारबाट ललितपुरस्थित नख्खु कारागार सारिएको छ । 

दुवै जनालाई यही मंगलबार ललितपुरको नख्खु कारागार सारिएको हो । गृह मन्त्रालयको पत्रका आधारमा उनीहरुलाई नख्खु कारागार पठाइएको केन्द्रीय कारागार प्रशासनले जनाएको छ । 

दुलाल र भण्डारी प्रकरणका मुख्य योजनाकार रहेको प्रहरी अनुसन्धानबाट खुलेको छ । उनीहरुकै बयानबाट विभिन्न भीआईपीहरु पक्राउ परेका थिए । सोही प्रकरणका मुछिएका पूर्व गृहमन्त्रीसमेत रहेका नेपाली कांग्रेस नेता बालकृष्ण खाण, पूर्वउपप्रधानमन्त्री समेत रहेका एमालेका नेता टोपबहादुर रायमाझी, सरकारका बहालवाला सचिव टेकनारायण पाण्डे, तत्कालीन गृहमन्त्री बादलका सुरक्षा सल्लाहकार इन्द्रजित राई, भुटानी शरणार्थी नेता टेकनाथ रिजाल, गृहमन्त्रालय मातहतका हज कमिटीका अध्यक्ष शमसेर मियाँ लगायत जेल परेका छ । दुलाल र भण्डारीबाहेक खाण, रायमाझीसहित बाँकी सबै १४ जना केन्द्रीय कारागारमै राखिएका छन् ।

प्रकरणमा ११ जना अझै फरार छन् । बादल पुत्र प्रतीक पनि प्रहरीको फरार सूचीमा रहेका छन् । एक जना आशिष चौधरीमाथि अनुसन्धानका क्रममा प्रहरी हिरासतमा छन् ।