बलात्कार मुद्दामा मालिकार्जुन गाउँपालिकाका वडाध्यक्ष धामी कारागार चलान

दार्चुला, १५ असार । जबर्जस्ती करणी गरेको आरोपमा पक्राउ परेका दार्चुलाका एक वडाध्यक्षलाई कारागार चलान गरिएको छ । करणी गरेको आरोप लागेका दार्चुलाको मालिकार्जुन गाउँपालिका–३ का वडा अध्यक्ष मदनसिंह धामीलाई जिल्ला अदालतको आदेशमा मुद्दा पुर्पक्षका लागि बुधबार कारागार चलान गरिएको हो । 

अध्यक्ष धामीले गाउँकै एक महिलालाई जबरजस्तीकरणी गरेको आरोपमा मुद्दा चलेको थियो । महिलालाई जबरजस्तीकरणी गरेको घटनामा जाहेरी परेपछि वडाध्यक्ष धामीलाई गत जेठ २४ गते जिल्ला सदरमुकाम खलंगाबाट प्रहरीले प्रकाउ गरेको थियो ।

प्रहरीले वडा अध्यक्ष धामीलाई २१ दिन सम्म हिरासतमा राखेर अनुसन्धान गरी सरकारी वकिलको कार्यालयमा पेश गरेको थियो । सरकारी वकिलको कार्यालयले प्रहरीले तयार पारेको मिसिलका आधारमा धामीमाथि अभियोग लगाई अदालत पेश गरेपछि जिल्ला अदालत दार्चुलाले अध्यक्ष धामीलाई तत्काल पुर्पक्षका लागि कारागार चलान गर्न आदेश दिएको हो ।