‘श्रम उत्सव’मा विप्लवले उडाए ड्रोन, १०० बिगाहमा धान रोपाइँ,  (फोटोफिचर)

१५ असार, काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा)ले राष्ट्रिय धान दिवस अवसरमा एक सय बिगाहमा धान रोपाइँ गरेको छ ।

‘आत्मनिर्भर उत्पादन, आत्मनिर्भर पार्टी’ नामक केन्द्रीय योजना अनुसार आज चितवन, बर्दिया, कपिलवस्तु, सिन्धुली, धनगढी, बाँके, रुपेन्देही, झापा, सुनसरी, नवलपरासी लगायत जिल्लाहरुमा गरी १०० बिगाहमा रोपाइँ गरेको केन्द्रीय कार्यालयले जनाएको छ । नेकपाले असार १५ लाई यस वर्षदेखि ‘श्रम दिवस’ मनाउने सुरु गरेको छ ।

रोपाइँको उद्घाटन महासचिव विप्लवले कपिलवस्तुको शिवराज नगरपालिकास्थित केन्द्रीय कार्यालय नजिक आयोजित रोपाइँ कार्यक्रममार्फत रोपाइँको उद्घाटन गरेका थिए । केन्द्रीय  उत्पादन नीतिअन्तर्गत कपिलवस्तुमा शुक्रबार बिहान ड्रोन उडाएर श्रम उत्सवमा रोपाइँको उद्घाटन गरेका हुन् । कार्यक्रममा ‘पार्टीको केन्द्रीय उत्पादन योजनाअन्तर्गत आत्मनिर्भर उत्पादन, आत्मनिर्भर पार्टी केन्द्रीय अभियान २०८०’ लेखिएको ब्यानर प्रदर्शन गरिएको थियो । 

उद्घाटन कार्यक्रममा महासचिव विप्लवले श्रम उत्सवले धर्ती जाली र फटाह–काँतरको नभई श्रमिको भएको सन्देश दिएको बताए । उनले आज देशैभरमा गरी पार्टी एक बिगाहमा धान रोपाइँ गरेको बताए । पार्टीले नेता कार्यकर्तालाई आफ्नै श्रम र मेहनतमा बाँच्न सिकाउने र पार्टीलाई श्रमिको पार्टी बनाउने अभियानमा उत्पादनले महत्वपूर्ण सहयोग पुग्ने बताए ।

आफ्नै मेहनत र पसिनाले राजनीति गर्ने संस्कृतिको विकास नेकपाले सुरु गरेको बताउँदै नेकपाले लिएको वैज्ञानिक समाजवादमा कोही पनि अरुको श्रममा बाँच्नु नपर्ने अवस्थाको ग्यारेन्टी हुने बताए । आफ्नै श्रमको प्रतिफलमा बाँच्न र मुलुकलाई आत्मनिर्भरताको कसरी बनाउन सकिन्छ भन्ने कुरा सिकाउन पार्टीले आर्थिक नीति अघि सारेको समेत स्पष्ट पारे । उनी बीउ उखेल्ने, झार्ने र राेप्ने काममा सहभागी बने ।

रोपाइँमा नेकपाका स्थायी समिती सदस्य विषम, शिलु लगायत नेताहरु सहभागी थिए ।