उपप्रधानमन्त्री नारायणकाजी श्रेष्ठ स्वदेश फिर्ता

१७ असार, काठमाडौं । उपप्रधान एवम् गृहमन्त्रीमन्त्री नारायणकाजी श्रेष्ठ चीनको भ्रमण सकेर स्वदेश फिर्ता भएका छन् । पाँचदिने भ्रमण सकेर उपप्रधानमन्त्री श्रेष्ठ आइतबार बिहान स्वदेश फिर्ता भएका हुन् । आइतबार बिहान सवा १ बजे त्रिभुवन अन्तर्राष्ट्रिय विमानस्थलमा अवतरण गरेका छन् । 

उनलाई चीनको छेन्दुस्थित थियान्फु अन्तर्राष्ट्रिय विमानस्थलमा सिचुवान प्रान्त सरकारका उपमहासचिव सियाओ फङ्ग, चिनियाँ कम्युनिस्ट पार्टी (सिपिसी) सिचुवान एयरलाइन्स कमिटीका सचिव सी छयी र छेन्दुस्थित नेपाली महावाणिज्यदूत दिनेशकुमार घिमिरेलगायतले बिदाइ गरेका थिए ।

उनलाई स्वागत गर्न पूर्वसभामुख एवम् माओवादी केन्द्रकी नेतृ ओनसरी घर्तीमगर, सुरक्षा निकायका प्रमुखहरू विमानस्थल पुगेका थिए । ७ सदस्यीय टोलीको नेतृत्व गरेर उनी गएको बुधबार चीन प्रस्थान गरेका थिए ।

भ्रमणका क्रममा उपप्रधानमन्त्री श्रेष्ठ र चीनका उपप्रधानमन्त्री ह लि फङबीच द्विपक्षीय भेटवार्ता गरे भने छेन्दुमा आयोजित १९औँ पश्चिम चीन अन्तर्राष्ट्रिय मेलालाई मुख्य वक्ताका रूपमा सम्बोधन गरेका थिए । विशिष्ट व्यक्ति तथा अधिकारीहरुसँगको भेटमा मन्त्री श्रेष्ठले छेन्दु–काठमाडौँ रुटमा हवाई उडान वृद्धि गर्न र छेन्दुबाट पोखरा र भैरहवा विमानस्थलमा उडान सुरु गर्न आग्रह गरेका थिए ।

अवतरणपछि आयोजित विमानस्थलमा आयोजित पत्रकार सम्मेलनमा चिनियाँ पक्षले बीआरआईबारे चासो राखेको जानकारी दिए ।