प्रतिनिधिसभाबाट राष्ट्र ऋण उठाउने विधेयक बहुमतले पारित

१७ असार, काठमाडौं । राष्ट्र ऋण उठाउने विधेयक प्रतिनिधिसभाबाट बहुमतले पारित भएको छ । आइतबार अर्थमन्त्री डा. प्रकाशशरण महतले आगामी आर्थिक वर्ष २०८०/८१ को बजेट कार्यान्वयनका लागि प्रस्तुत उक्त विधेयक ध्वनि मतका आधारमा बहुमतले पारित भएको सभामुख देवराज घिमिरेले घोषणा गरेका हुन् । 

विधेयकको विरोधमा सांसद सुमाना श्रेष्ठ र प्रेम सुवालले प्रस्ताव राखेका थिए । दुवै प्रस्ताव बुहमतले अस्वीकृत भएको थियो । विधेयकमाथि छलफलमा भाग लिने सांसदहरुले ऋण मुलुकको आवश्यकतामा मात्र उठाउनुपर्ने र ऋणलाई भौतिक पूर्वाधारमा मात्र खर्च गरिनुपर्नेमा जोड दिएका थिए ।

आजकै बैठकले आगामी आवको बजेटमा कर थपघट तथा दर तर्जुमासम्बन्धी आर्थिक विधेयक २०८० पनि बहुमतले पारित भएको छ । उक्त विधयेकमा सांसद सुवाल, श्रेष्ठ र शिशिर खनालले राखेको विरोध प्रस्ताव अस्वीकृत भएको थियो ।