डाक्नेश्वरी नगरपालिकाकी उपप्रमुख मीराकुमारीसँग दोहोरो नागरिकता

१८ असार, काठमाडौं । सप्तरीको डाक्नेश्वरी नगरपालिकाकी उपप्रमुख मीराकुमारी यादवसँग दोहोरो नागरिकता रहेको खुलेको छ । उपप्रमुख मीराकुमारी र उनकी पति महेन्द्रकुमार यादव भारतीय नागरिक भएको र दुवै जनाले नेपालको नागरिकता लिएकाे पाइएको छ । 

दोहोरो नागरिकता बोकेर गतिविधि गरेको पाइएपछि डाक्नेश्वरीका कृष्णकुमार यादवले कारबाहीका लागि जिल्ला अदालत सप्तरीमा कीर्ते र दोहोरो नागरिकता कसुरमा कारबाहीको माग गर्दै प्रहरीमा उजुरी दिएका छन् । दुवै जनासँग भारतीय नागरिकता कायम रहेकाे अवस्थामा झुटा कागजात पेस गरेर नेपाली नागरिकता लिएकाे र साेही आधारमा नेपालभित्र गतिविधि गरिरहेकाे पाइएकाे छ ।

सुरुमा कारबाहीका लागि दिइएको उजुरी प्रहरीले लिन नमानेपछि उच्च अदालत राजबिराज पुगेका कुष्णकुमारको निवेदनमाथि सुनुवाइपश्चात उजुरी दर्ताका लागि आदेश जारी भएपछि प्रहरीले उजुरी लिएको थियो । उजुरीपछि मीरा र महेन्द्र विरुद्ध सरकार वादी भएर नागरिकता कसुरमा मुद्दा दर्ताका लागि पक्राउ पुर्जी लिन निवेदन दिइएको छ । मीराकुमारी २०७९ वैशाख १० मा भएको स्थानीय चुनावमा एमालेबाट निर्वाचित भएकी हुन् । प्रमुख रामलखन मलाह पनि एमालेबाट निर्वाचित हुन् ।

मीरा दम्पत्तिले भारतीय नागरिकता कायम रहेको अवस्थामा नक्कली कागजात पेस गरी सप्तरीबाट नेपाली नागरिकता लिएको खुलेको छ । उपप्रमुख मीरा र उनका पति महेन्द्र भारतको बिहार राज्य अन्तर्गत सुपौल जिल्लाको निर्मली थानास्थित मझारी ग्रामका बासिन्दा रहेको खुलेको छ । उनीहरूले सप्तरीको हाल डाक्नेश्वरी नगरपालिका-६ (साविक औरही गाविस वडा नम्बर–३) ठेगाना भएको झुठो विवरण देखाएर नागरिकता प्रमाणपत्र लिएको पाइएको छ । 

झुठा कागजपत्र पेस गरी जिल्ला प्रशासन कार्यालयबाट नेपाली नागरिकता लिएको खुलेसँगै उनीहरुविरुद्ध नागरिकता कसुरमा अनुसन्धान तथा मुद्दा दर्ताका लागि निवेदन दिएको सप्तरीका प्रहरीले जनाएको छ । अदालतबाट पक्राउ पुर्जी जारी भएपछि पक्राउका लागि बाटो खुल्ने प्रहरीले जनाएको छ । उजुरी परेदेखि नै महेन्द्रकुमार फरार रहेकाे बुझिएकाे छ ।