कानुनव्यवसायी लामिछानेविरुद्धको अभियोग फिर्ताको माग गर्दै वकिलहरु प्रदर्शनमा

१८ असार, काठमाडौं । कानून व्यवसायी अमर लामिछानेविरुद्धको अभियोग फिर्ताको माग गर्दै देशभरका कानुन व्यवसायी (वकिल)हरु विरोध प्रदर्शनमा उत्रिएका छन् ।

गत बिहीबार ललितपुर जिल्ला अदालतकी नायब सुब्बा प्रेमिका तामाङमाथि कुटिपिट गरेको अभियोगमा प्रहरीले वकिल अमर लामिछानेलाई पक्राउ गरी अभियोगमा मुद्दा चलाउने तयारी भइरहेको बेला देशभरका वकिलहरुले प्रदर्शनमा उत्रिएका हुन् । आइतबार बिहान १० देखि साढे १ बजेसम्म पेन डाउन गरेका उनीहरुले सोमबार भने जिल्ला जिल्लामा विरोध सभा नै गरेका छन् । पेनडाउनका कारण आइतबार सर्वोच्च अदालतमा समेत सुनुवाइ प्रभावित बनेको थियो ।

जिल्लादेखि सर्वोच्च अदालतमा आज मुद्दामा बहस पैरवीमा भाग लिएका छैनन् । घटना स्थल ललितपुरको जिल्लाअ अदालत परिसरमा वकिलहरु ठूलो संख्यामा भेला भएर विरोध सभा गरे । विरोधसभाको नेतृत्व जिल्ला बार एसोसिएसनले गरेको हो । 

नासु तामाङलाई कार्यकक्षमै फाइल हेर्ने नाममा कुटपिट गरेको र कुटपिटबाट उनको मुखमा गहिरो चोट लाग्नुका साथै सर्ट समेत च्यातिएको छ । सोही घटनामा लामिछानेलाई तामाङको उजुरीमा पक्राउ गरेको थियो । विरोधपछि लामिछानेलाई प्रहरीले आइतबार साँझ नै साधारण तारेखमा रिहा गरिसकेको छ । तर अभियोगपत्र फिर्ता नभएको भन्दै उजुरी झुठो रहेको र फिर्ता हुनुपर्ने माग प्रदर्शनकारीहरुको छ । 

आज वकिलहरुले बन्दी प्रत्यक्षीकरण रिटबाहेक अन्य मुद्दामा बहसमा भाग नलिने घोषणा गरेका छन् । भाग नलिँदा सबै तहका अदालतमा मुद्दाकाे सुनुवाइ समेत प्रभावित भएकाे छ । वकिलहरुले कुटपिट घटनाको निष्पक्ष छानबिन गरी दोषी पत्ता लगाउनुपर्ने र घटनाको सीसी टिभीफुटेजको अध्ययन हुनुपर्ने माग राखेका छन् ।