पत्रकार लुईटेललाई पितृशोक

१८ असार, विराटनगर । मोरङका पुराना पत्रकार शंकर लुइँटेललाई पितृशोक परेको छ । उनका बुवा छत्रपति लुइँटेलको गत असार १५ गते शुक्रबार विराटनगर स्थित निजी निवास मै स्वर्गारोहण भएको हो । 

२१ दिनसम्म विराटनगर स्थित कोशी अस्पतालको आईसीयूमा भर्ना भएर उपचार गराइरहनु भएका स्वर्गीय लुइँटेल मृगौला र प्रोस्टेट लगायतका रोगबाट ग्रस्त हुनुहुन्थ्यो । 

बिसं २००२ साल चैत २६ गते जन्मनु भएका सामाजिक व्यक्तित्व स्व लुईटेलको ७८ बर्षको उमेरमा निधन भएको हो । समाजसेवा र राजनीतिमा संलग्न उहाँका तीन छोरा शंकर, सुनिल र समीर लुईटेल, तीन छोरी शारदा दाहाल, सुशीला पोखरेल र सुष्मा पोखरेल रहेका छन् ।

जेठा छोरा शंकर नेपाल प्रेस यूनियनका संस्थापक नेता तथा पत्रकार महासंघ मोरङका सल्लाहकार छन् । काठमाडौंबाट प्रकाशित हुने राष्ट्रिय स्तरका एक दर्जन भन्दा बढी पत्रपत्रिकाहरुमा पूर्वाञ्चल संवाददाता रहिसकेका पत्रकार लुइँटेल हाल नेपालबहस डटकम र आर्थिक राष्ट्रिय दैनिकका कोशी प्रदेश प्रमुखका रुपमा कार्यरत छन् । उनी पत्रकार महासंघ मोरङका संस्थापक सहसचिव पनि हुन् ।

दर्जनौं सामाजिक संघसंस्थामा आबद्ध पुराना पत्रकार लुइँटेलका बुबाको निधनको दुखद घडीमा नेपालबहस परिवार दिवंगत आत्माको चीर शान्तिको कामना गर्दै भावपूर्ण श्रद्धाञ्जली अर्पण गर्दछ एवं उहाँको बैकुण्ठबासको कामना गर्दछ । साथै पत्रकार शंकर लुइँटेल एवं लुइँटेल परिवारमा पर्न गएको यो बज्रपातलाई सहनसक्ने शक्ति प्राप्त होस् भन्दै हार्दिक समवेदना प्रकट गरेको छ ।