राष्ट्रियसभामा ५ मन्त्रालयका विनियोजित बजेटमाथि दफावार छलफल

१८ असार, काठमाडौं । राष्ट्रियसभामा सोमबारको बैठकमा सरकारले गत जेठ १५ मा प्रस्तुत गरेको आगामी आर्थिक वर्ष २०८०/८१ को वार्षिक बजेटअन्तर्गत मन्त्रालयगत विनियोजित बजेट शीर्षकमाथि दफावार छलफल सुरु भएको छ । 

सभाका उपाध्यक्ष उर्मिला अर्यालले बैठकका कार्यसूचीबारे जानकारी दिँदै वन तथा वातावरण, महिला, बालबालिका तथा ज्येष्ठ नागरिक, शहरी विकास, युवा तथा खेलकुद, उद्योग, वाणिज्य तथा आपूर्ति मन्त्राललयमा विनियोजित बजेट शीर्षकमाथि छलफल हुने जनाएकी छन् । 

छलफलमा माग लिएका एमालेका सांसदहरुले विनियोजित बजेट असन्तुलित र विभेदकारी रहेको भन्दै हरेक मन्त्रालयमा एक रुपैयाँ मात्र बाँकी राखेर सबै बजेट कटौती गर्न प्रस्ताव परेका छन् । संसदमा यो प्रस्तावलाई विरोधका रुपमा लिइन्छ । उनीहरूले वडा स्तरबाट हुने कार्यक्रममा केन्द्र सरकारले १/२ लाख रूपैयाँ बजेट  छुट्याएर संघीयताकाे मर्मवपरीत काम गरेकाे भन्दै बजेटकाे विराेध गरे । छलफल जारी छ ।

बजेट प्रतिनिधिसभाबाट भने दफावार छलफल सकेर असार १३ गते नै मतदानबाट बहुमतले पारित भइसकेको छ ।