कोशी प्रदेशमा नयाँ सरकार गठनमा निर्णायक बन्दै जसपा

१८ असार, काठमाडौं । अल्पमतमा परेको एमाले नेतृत्वको सरकार ढलेपछि नयाँ सरकार गठन प्रक्रियामा एक मत रहेको जनतासमाजवादी पार्टी (जसपा) निर्णायक बनेको छ ।

एमालेसँग राप्रपा मात्र रहेको अवस्थामा इतर दलहरु पहिलो र तेस्रो दल क्रमशः कांग्रेस र माओवादी केन्द्रले अब बन्ने सरकारको नेतृत्वमा दाबी गरिरहेका छन् । एमाले र राप्रपा गरी ४६ मत छन् ।

यद्यपि ९३ मत रहेको कोशी प्रदेशमा सरकार गठनका लागि ४७ मत आवश्यक पर्छ । तर नेतृत्व दाबी गरिरहेका गठबन्धनमा आवद्ध दलहरु कांग्रेस, माओवादी र एकीकृत समाजवादी मिल्दा ४६ मत मात्र पुग्छ ।

गठबन्धनकै घटक रहेका जसपासँग एक मत छ । गठबन्धन वा इतर पक्षले जसले नेतृत्व (मुख्यमन्त्री)मा दाबी गरेपनि अहिलेसम्म जसपासँग रहेको एक मत प्राप्त गर्न सक्नुमा निर्भर छ । 

कोशी नामप्रति असहमति जनाउँदै जसपाले मन्त्री रहेकी निर्मला लिम्बूलाई गठ जेठ १७ गते मुख्यमन्त्री कार्कीलाई दिएको समर्थन फिर्ता लिँदै सरकारबाट फिर्ता बोलाइएको थियो ।

यस्तो अवस्थाबीच प्रदेश प्रमुख पर्शुराम खापुङले आइतबार नै २ वा २ भन्दा बढी दल सम्मिलित बहुमतको सरकार गठनका लागि असार २१ गते बेलुका ५ बजेसम्ममा बहुमत (कम्तीमा ४७ सदस्यको समर्थन) जुटाएर दाबी पेस गर्न आह्वान गरिसकेका छन् । 

निर्णायक बनेका जसपाले प्रदेशको नाम कोशीलाई पहिचानका आधारमा राख्न तयार हुने पक्षलाई मत दिने निर्णय गरेको छ । कोशीमा नयाँ सरकार गठनको विषय पेचिलो बन्दै गर्दा कोशीका राजनीतिक दलहरु केन्द्रको मुख ताकिरहेका छन् । केन्द्र सरकारको समिकरणअनरुप बनाउँदा कांग्रेस या माओवादी केन्द्रको नेतृत्वमा सरकार बन्ने अवस्था देखिन्छ । 

यस्तो अवथाबीच प्रधानमन्त्री प्रचण्डले आज दिउँसो ४ बजे बालुवाटारमा गठबन्धन दलहरुको बैठक बोलाएका छन् । बैठकमा कोशी प्रदेश सरकार गठनका विषय मुख्य एजेण्डा रहने स्रोतको भनाइ छ ।

गठबन्धनमा एमाले, राप्रपा, रास्वपा र नेमकिपाबाहेक ८ दल आवद्ध छन् । कोशीमा रास्वपा, राजमो, नेमकिपा, नाउपाका सांसद छैनन् ।