बलात्कार मुद्दामा ६ वर्ष कैदसजाय पाएका प्रतिवादी १३ वर्षपछि पक्राउ

१८ असार, काठमाडौं । अपहरण तथा जबरजस्ती करणी मुद्दामा दोषी ठहर भएका प्रतिवादी १३ वर्षपछि पक्राउ परेका छन् । पक्राउ पर्नेमा दाङको साविक उरहरी गाविस–८ घर भई हाल काठमाडौंको तारकेश्वर नगरपालिका–५ बस्ने वर्ष ३१ को नविन बस्नेत रहेका छन् ।

प्रहरीको केन्द्रीय अनुसन्धान ब्यूरोबाट फैसला कार्यान्वयन तथा फरार प्रतिवादीहरुको खोजतलास एवं पक्राउको लागि परिचालित टोलीले उनलाई यही आइतबार साँझ काठमाडौंको काभ्रेस्थलीबाट पक्राउ गरिएको हो । 

अध्ययन तथा नागरिता बनाउने कामको सिलसिलामा दाङको तुलसीपुर–५, नयाँ बसपार्कस्थित न्यू राप्ती गेष्ट हाउसमा दाजु नाता पर्ने एकजना व्यक्तिको साथमा बास बसेकी युवतीलाई नविन बस्नेत समेतका व्यक्तिहरूले २०६७ असार १५ गते राति अन्दाजी ११ः३० बजे लछार–पछार, कुटपिट गरी भगाई पीडित युवतीलाई अपहरण गरी लगेर तुलसीपुर–५ र ९ को सिमानामा पर्ने एकान्तस्थल पातुखोला बगरमा सामुहिक जबरजस्ती करणी गरेका थिए । सोका जाहेरी लछारपछारमा सँगै परेका नााले दाजु पर्ने व्यक्तिले दिएका थिए । नबिन घटनापछि फरार रहँदै आएका थिए ।

जाहेरीका आधारमा प्रहरीले चलाएको अपहरण तथा बलात्कार मुद्दामा बस्नेतलाई जिल्ला अदालत दाङले ६ वर्ष कैद सजायको फैसला सुनाएको थियो । पछि सोही फैसलालाई सर्वोच्च अदालतको मिति २०७९ जेठ १० मा सदर गर्दै बस्नेतलाई साविक मुलुकी ऐन बमोजिम ६ वर्ष कैद हुने ठहर हुने फैसला सुनाएकाे थियो । 

पक्राउ परेका बस्नेतलाई फैसला कार्यान्वयनको लागि जिल्ला अदालतमा पेश गरिएको छ ।