ह्याकरको नियन्त्रणमा पुगेको फेसबुक पेजलाई सशस्त्रले माया मार्यो

१९ असार, काठमाडाैं । लामो समयदेखि ह्याकरको कब्जामा रहेको सशस्त्र प्रहरी बल, नेपालले सामाजिक सञ्जाल फेसबुक आफ्नो नियन्त्रणमा ल्याउन असफल भएको छ । पुरानो एकाउण्ट ह्याकरले लगेपछि सशस्त्र प्रहरीले नयाँ फेसबुक पेज सञ्चालनमा ल्याएको छ ।

यसअघिको आफ्नो फेसबुक पेज ह्याकरको कब्जाबाट निकाल्न नसकेपछि नयाँ पेज सञ्चालनमा ल्याइएको हो । विगतमा सञ्चालित फेसबुक पेजमा विभिन्न समस्या आएकाले हाल नयाँ फेसबुक पेज सञ्चालनमा ल्याइएको सशस्त्र प्रहरीले जनाएको छ । ‘आजै परिपत्र गरिएको छ, नयाँ सामाजिक सञ्जाल फेसबुक पेज सञ्चालनमा आएको छ’, सशस्त्र प्रहरीका एक अधिकृतले भने ।

सशस्त्र प्रहरीको आधिकारिक फेसबुक पेज लामो समयदेखि ह्याकरको कब्जामा छ । उक्त पेजलाई पुनः नियन्त्रणमा ल्याउने प्रयास असफल भएपछि बाध्य भएर सशस्त्रले नयाँ पेज सञ्चालनमा ल्याएको हो  । सशस्त्रले आधिकारिक फेसबुक पेजसँग मिल्दोजुल्दो नाममा बनाइएका अन्य एकाउन्टबाट नझुक्किन समेत सचेत गराएको छ ।

दैनिक रुपमा संगठनका गतिविधि अपलोड भएका पेज एकिन गरेर मात्र फलो तथा लाइक गर्न सुझाइएको छ । संगठनसँग सम्बन्धित विविध गतिविधि प्राप्त गर्न नयाँ पेजलाई फलो तथा लाइक गर्न पनि आग्रह गरिएको छ । साथै, ट्विटर पेजसमेत फलो तथा लाइक गर्न अनुरोध गरिएको छ ।