सुरक्षा माग गर्दै सर्वोच्च पुगे ललितपुर जिल्ला अदालतका कर्मचारी

१९ असार, काठमाडौं । कानुन व्यवसायी (वकिल)बाट आफूहरूलाई ज्यानकै खतरा बढेको भन्दै ललितपुर जिल्ला अदालतका सबै कर्मचारी कार्यालय छाडेर सर्वोच्च अदालतमा पुगेका छन् ।

वकिलहरुबाट बारम्बार कुटपिट र ज्यान मार्ने धम्की आएका कारण कार्यालयमा बसेर काम गर्न सक्ने अवस्था नरहेको भन्दै न्यायालयको सर्वोच्च संस्था सर्वोच्च अदालत पुगेका हुन् । न्यायाधीश समेत सर्वाेच्च पुगेका छन् ।

ललितपुर अदालतका नायब सुब्बा प्रेमिका तामाङमाथि असार १३ गते कार्यकक्षमै वकिल अमिर लामिछानेले कुटपिट गरी सर्त च्यातिने र घाइते तुल्याएको घटनापछि वकिल र कर्मचारीबीच द्वन्द्व नै चलेको छ । 

वकिलहरुले लामिछानेलाई फसाइएको आरोप लगाउँदै आइतबार देशभरका अदालतमा पेनडाउन गरे भने सोमबार देशैभरका अदालतमा बहसमा भाग लिएनन् । जसका कारण बेञ्च बस्ने सकेन र मुद्दाको सुनुवाइ प्रभावित बन्न पुग्यो । प्रहरीले आरोी लामिछानेलाई साधारण तारेखमा रिहा गरेपनि मुद्दाको किनार लाग्न बाँकी नै । वकिलहरुले भने फाइल हेर्ने क्रममा कर्मचारीले घुस मागेको अवस्थामा तानातान हुँदा चोट लागेको भन्दै मुद्दा झुटो भएकाले फिर्ता हुनुपर्ने माग गरेका छन् । 

यस्तो अवस्थाबीच कर्मचारीले भने वकिलहरुले धम्क्याउन नछाडेको भन्दै काम गर्न सक्ने अवस्था नभएकाले कार्यालय छाड्न बाध्य भएको बताएका छन् । घटनाको निष्पक्ष छानबिन गर्न उनीहरुले माग गरेका छन् । कर्मचारीहरूले भने आफूहरूको जिउधनको सुरक्षाको ग्यारेन्टी नभएसम्म काममा नफर्कने अडान लिएका छन् ।