ललितानिवास प्रकरण : हिरासतमा रहेका ३ आरोपीको बन्दी प्रत्यक्षीकरण रिटमा सुनवाइ भएन

१९ असार, काठमाडौं । सरकारी स्वामित्वको ललिता निवासको जग्गा हिनामिना प्रकरणमा पक्राउ परेका ३ जनाको बन्दी प्रत्यक्षीकरणको रिटमाथि मंगलबार पनि सर्वोच्च अदालतमा सुनुवाइ हुन सकेन ।

रिटमाथि अन्तरिम आदेश दिनु पर्ने वा नपर्ने टुंगो लगाउन सुनुवाइका लागि न्यायाधीशद्वय आनन्दमोहन भट्टराई र हरिप्रसाद फुयालको संयुक्त इजालसमा पेसी तोकिएको थियो । तर सर्वोच्च प्रशासनले ‘हेर्न नभ्याइने’ राखेको छ । 

प्रहरीको केन्द्रीय अनुसन्धान ब्यूरो (सीआईबी)ले यही असार १२ गते जग्गा हिनामिनामा संलग्नताको आरोपमा पक्राउ गरी हिरासतमा राखेर अनुसन्धान गरिरहेको छ । सोही क्रममा आरोपी सुधीरकुमार शाह, मीनबहादुर गुरुङ र धर्मप्रसाद गौतमले आफूहरुलाई रिहा गर्न माग गर्दै असार १३ मा बन्दी प्रत्यक्षीकरण रिट दायर गराएका थिए ।

रिटमाथि न्यायाधीश कुमार चुडालको एकल इजलासले प्रारम्भिक आदेश दिँदै सरकारसँग पक्राउका लिखित कारण पेस भनेको थियो । सरकारले लिखित जवाफ पेस गरेपछि आज सुनुवाइको तयारी भएको थियो ।