पहिरोका कारण महाकाली लोकमार्ग अवरुद्ध

१९ असार, काठमाडौं । वर्षासँगै खसेको पहिरोका कारण महाकाली लोकमार्ग अवरुद्ध भएको छ । शैल्यशिखर नगरपालिका–६ पनेबाज क्षेत्रमा मंगलबार बिहान पहिरो खस्दा लोकमार्गको खलंगा-गोकुलेश्वर सडक खण्ड बन्द भएको हो । सोमबार रातिदेखि परेको अविरल वर्षापछि ठाउँ–ठाउँमा पहिरो खसेको छ । 

खलंगाबाट महेन्द्रनगर–काठमाडौंका लागि छुटेका बस सडक अवरुद्ध हुँदा बाटोमै रोकिएका छन् । पहाडी क्षेत्रमा जाने बसहरु महेन्द्रनगर र धनगढीमै रोकिएका छन् । 

पहिरो पन्छाउने काम आज बिहानैदेखि डिभिजन सडक बैतडी पाटनको लोडरले प्रयास गरिरहेको सडक विभागका सुपरभाइजर राजेन्द्रसिंह धामीले बताए । सोमबार रातिदेखि सुरु भएको वर्षा अझै पूर्णरुपमा रोकिनसकेको उनले बताए ।