कांग्रेसको लुम्बिनी प्रदेश सम्मेलन भाद्र महिनामा गर्ने तयारी

२० असार, दाङ । नेपाली कांग्रेस लुम्बिनी प्रदेशले आफ्नो प्रदेश सम्मेलन आगामी भाद्र महिनामा गर्ने भएको छ । नेपाली कांग्रेस लुम्बिनी प्रदेशको भालुवाङमा बसेको बैठकले सम्मेलनका लागि तयारी प्रारम्भ गर्ने निर्णय गरेको हो ।

सम्मेलनमा प्रदेश समितिका पदाधिकारी, सदस्य, प्रदेश क्षेत्रीय सभाका सभापति एवं सम्मेलन प्रतिनिधिहरूको सहभागिता हुने नेपाली कांग्रेस लुम्बिनी प्रदेश सभापति अमरसिंह पुनले बताए । कांग्रेस नेतृत्वमा रहेको लुम्बिनी प्रदेश सरकारलाई थप सशक्त र जनमुखी बनाउनको लागि जनभावना अनुरूप कार्यक्रम निर्माण र परिचालन गर्नको लागि सरकार र पार्टीबीच समन्वयका साथ अगाडि बढ्ने पनि कांग्रेस लुम्बिनीले जनाएको छ ।

कांग्रेस लुम्बिनीले भातृ तथा शुभेच्छुक संघ संस्थाहरूमा नियुक्तिका लागि सम्बन्धित तहका समितिको सिफारिसमा मात्र गर्न पनि केन्द्रीय समितिलाई अपिल गरेको छ । वैठकले प्रदेश सभा क्षेत्रका क्षेत्रीय सभापतिहरूलाई पार्टीको नीति र समसामयिक राजनीतिको विषयमा प्रशिक्षण दिने निर्णय गरेको छ ।

त्यस्तै लुम्बिनी प्रदेश समतिले विभिन्न विभागहरूलाई पूर्णता दिदै ग्राउण्ड लेबलसम्म पार्टीको परिचालन संयन्त्रलाई प्रभावकारी बनाउने निर्णय गरेको प्रदेश सभापति पुनले नेपालबहसलाई बताए ।