प्रतिनिधिसभा बैठकमा विपक्षीहरूको अवरोध, आधा घण्टाका लागि स्थगित

२० असार, काठमाडौं । प्रमुख प्रतिपक्षी नेकपा (एमाले) ले प्रतिनिधिसभाको बुधबारको बैठक अवरोध गरेको छ । प्रधानमन्त्री प्रचण्डले गत सोमबार काठमाडौंमा आयाेजित पुस्तक विमोचन कार्यक्रममा आफूलाई प्रधानमन्त्री बनाउन सरकार प्रितम सिंहले पटक पटक भारतको नयाँ दिल्ली गएको भनी अभिव्यक्ति दिएको भन्दै विरोधमा प्रतिनिधिसभाको बैठक सुरु लगत्तै अवरुद्ध गरेको हो । बैठक आज दिउँसो ४ बजे सुरु भएको थियाे ।

सभामुख देवराज घिमिरेले बैठक सुरु भएको जानकारी दिना साथ एमालेका सांसद रघुजी पन्तले प्रधानमन्त्रीले देशको शिर निहुरिने र संसदको मानमर्दन हुने गरी अभिव्यक्ति दिएको भन्दै सदनमा उपस्थित भएर प्रधानमन्त्रीले प्रष्टीकरण नदिएसम्म सदन चल्न नदिने धारणा राखे । लगत्तै एमाले, रास्वपा र राप्रपाका सांसदहरुले रोष्ट्रम घेराउ गरेका छन् ।

सांसद पन्तले प्रधानमन्त्रीलाई संसदले नभई कसैले बनाइदिएको अभिव्यक्ति दिने प्रधानमन्त्री प्रचण्डले राजीनामा दिनुपर्ने धारणा राखे । उनले देशका प्रधानमन्त्री कसले बनाउँछ भन्दै प्रश्न गरे । ‘सभामुख महोदय, प्रधानमन्त्री सार्वभौम संसदले बनाउँछ कि कसले बनाउँछ ?’ पन्तले प्रश्न गरे ।

बैठकमा शून्य समय दिएर सांसदहरुलाई बोल्न समय दिइए पनि बैठक चल्न नसके पछि सभामुख घिमिरेले आधा घण्टाका लागि बैठक स्थगित गरेका छन् ।

यसअघि साढे २ बजे सुरु भएको माथिल्ले सदन राष्ट्रियसभाको बैठक पनि एमालेका सांसदहरुले प्रधानमन्त्रीको अभिव्यक्तिलाई लिएर अवरुद्ध बनाएपछि आजै बस्ने गरी स्थगित भएको छ । बैठक अझै बस्न सुरु हुन सकेको छैन ।