मोटरसाइकलले कुकुर किचेको विवादमा चालकद्वारा गोली प्रहार

२१ असार, काठमाडौं । महोत्तरीमा मोटरसाइकलले कुकुरलाई किचेको घटनामा चलेको विवादमा कुकुर मालिकमाथि मोटरसाइकल चालकले गोली प्रहार गरेका छन् । 

मंगलबार रामगोपालपुर नगरपालिका–१ बसबिट्टिमा कौशल मण्डलले चलाएको बा. २८ प. ९८८ नम्बर प्लेटको मोटरसाइकलले श्रवणको कुकुरलाई छोएपछि विवाद चलेको थियो । विवादका क्रममा श्रवणसहित समूहले ३८ वर्षीय कौशलमाथि कुटपिट गरेको थियो । कुटपिटबाट सामान्य घाइते भएका कौशलले यादवलाई ज्यान मार्ने धम्की दिएर घर गएका थिए ।

त्यसपछि कौशलले सोही दिन साँझ पेस्तोल लिएर रामगोपालपुर चोकमा पुगेर ४४ वर्षीय श्रवणमाथि २ राउण्ड गोली प्रहार गरेका थिए । प्रहारपछि फरार हुने क्रममा उनी समातिए ।

गोली एउटा छातीमा र अर्को घाँटी हुँदै कञ्चटबाट निस्किएको प्रहरीले जनाएको छ । कौशललाई पेस्तोल र ३ राउण्ड गोलीसहित पक्राउ गरिएको छ । उनीमाथि जिल्ला अदालत महोत्तरीबाट ५ दिनको म्याद थप गरी अनुसन्धान भइरहेको प्रहरीले जनाएको छ । उनलाई प्रहरीले बिहीबार नै सार्वजनिक गरेको छ ।

गोली लागी गम्भीर घाइते श्रवणको जनकपुरधामस्थित जानकी हेल्थ केयर एण्ड रिसर्च सेन्टरको आईसीयुमा राखेर उपचार भइरहेको छ । गोली हानी भाग्न खोज्दा समात्ने क्रममा श्रवणका अविनाश र स्थानीय सियाशरण मण्डल घाइते भएका छन् । पक्राउ परेका अभियुक्त केही दिन अघिमात्र कुवेतबाट घर फर्केको पाइएको छ ।