बलात्कार आरोपमा गुप्तचरका कर्मचारी पक्राउ

२१ असार, काठमाडौं । सरकारको गुप्तचर निकाय राष्ट्रिय अनुसन्धान विभागका एक जना कर्मचारी (सूचक) जबर्जस्ती करणी (बलात्कार)को आरोपमा  प्रहरीले पक्राउ गरेको छ । पक्राउ पर्नेमा विभागमा कार्यरत दाङ घर भएका दामोदर पौडेल रहेका छन् । 

पीडितले दिएको किटानी जाहेरीका आधारमा पौडेललाई पक्राउ गरेर काठमाडौं प्रहरी अन्तर्गतको महिला सेलले आवश्यक अनुसन्धान गरिरहेको जिल्ला प्रहरी काठमाडौं परिसरले जनाएको छ । उनलाई निलम्बन गरिएको छ ।

सामाजिक सञ्जालमार्फत सम्पर्कमा आएकी पीडितलाई डर, धाक, धम्की दिई तथा ववाह गर्ने भनी झुक्याएर पौडेलले करणी गरेको खुलेको दाबी प्रहरीको छ । पीडितका अनुसार करणी उनकै कोठामा २०७८ को माघ महिनाबाट सुरु भएको र पछिल्लो पटक गत वर्ष भदौमा करणी गरेका थिए ।