जिल्ला अदालतको आदेशविरुद्ध आङटावा शेर्पासहित ७ जनाले दिए उच्च अदालत पाटनमा निवेदन

२१ असार, काठमाडौं । नक्कली शरणार्थीको कोटामा अमेरिका पठाउने नाममा ठगी धन्दा चलाएको आरोपमा कारागार थुनामा रहेका मध्ये ७ जनाले उच्च अदालतमा निवेदन दिएका छन् ।

काठमाडौं जिल्ला अदालतको आदेश विरुद्ध पूर्वसांसद आङटावा शेर्पा र इन्द्रजित राईसहित ७ जनाले निवेदन दर्ता गराएका हुन् । 

फौजदारी कार्यविधि संहिता २०७४ को दफा–७३ बमोजिम ‘बेरितको आदेश बदर गरि पाउँ’ भन्दै निवेदन दिनेमा पूर्वसांसद आङटावा शेर्पा, नरेन्द्र केसी, गोविन्दबहादुर चौधरी, पूर्वसांसद शेर्पा, इन्द्रजित राई, सानु भण्डारी, हरिभक्त महर्जन छन् ।

काठमाडौं जिल्ला अदालतका न्यायाधीश प्रेमप्रसाद न्यौपानेले असार १ मा पूर्वगृहमन्त्री बालकृष्ण खाँण, एमाले नेता टाेपबहादुर रायमाझीसहित १६ जनालाई थुनामा राख्ने आदेश गरेका थिए । 

उनीहरू मुद्दा पुर्पक्षका लागि केन्द्रीय कारागार सुन्धारा, नख्खु कारागार ललितपुरमा कैदी बन्दी छन् ।