प्रतिनिधिसभाको बैठक ३ बजेसम्मका लागि सारियो

२४ असार, काठमाडौं । आज दिउँसो १ बजेका लागि बोलाइएको संघीय संसदको तल्लो सदन प्रतिनिधिसभाको बैठक दुई घन्टा पछि सारेर ३ बजेका लागि तय गरिएको छ । प्रमुख प्रतिपक्षी एमालेले बैठक  चौथो दिन आज पनि अवरुद्ध पार्ने अडान नछाडेपछि खुलाउनेबारे प्रधानमन्त्री प्रचण्डले एमाले र कांग्रेसका शीर्ष नेतृत्वसँग छलफलमा समय लाग्ने भएका कारण उनकै अनुरोध २ घण्टा पछि सारिएको हो । 

बैठक ३ बजेलाई सरेको सभामुख देवराज घिमिरेका प्रेस संयोजक चेतन अधिकारीले जानकारी दिएका छन् । अहिले संसद खुलाउनेबारे प्रधानमन्त्री, कांग्रेस सभापति शेरबहादुर देउवा र एमाले अध्यक्ष केपी शर्मा ओलीबीच प्रधानमन्त्री कार्यालय सिंहदरबारमा छलफल भइरहेको छ ।

बैठक सुचारु बनाउन यसअघि सभामुख देवराज घिमिरेले गरेको पटकपटकको प्रयास सफल हुन नसकेपछि प्रधानमन्त्री स्वयम् सक्रिय भएका छन् । उनले असार १८ गते काठमाडौंमा भारतीय मूलका नागरिक प्रितम सिंहको जीवनीमा लिखित पुस्तक विमोचन कार्यक्रममा आफूलाई प्रधानमन्त्री बनाउन सिंह पटकपटक भारतको नयाँदिल्ली धाएको र नेपालका राजनीतिक दलको नेताहरुसँग बाक्लो भेटघाट गरेको भनी दिएको अभिव्यक्तिलाई लिएर एमालेले लगातार तीन पटक बैठक अवरुद्ध पारेको थियो । प्रधानमन्त्रीको उक्त अभिव्यक्तिले सार्वभौम संसद र नेपालीको अपमान भएको र प्रधानमन्त्रीको आत्मसमर्पण चरित्र उदांगो भएको भन्दै पदबाट राजीनामा दिनुपर्ने माग अगाडि सारेका छन् । 

सोही माग राख्नै एमालेले आज बसेको राष्ट्रिय सभाको बैठक अवरुद्ध पारेको छ । यो अवरुद्ध चौथो पटक हो । आजको प्रतिनिधिसभाको बैठक पनि चल्न नदिने अडानमा एमाले रहेको छ ।