आरजुको नाम लिएको अडियोको ‘उत्पत्ति’ पत्ता लगाउन प्रहरीद्वारा सिंगापुरमा पत्राचार

२४ असार, काठमाडौं । नक्कली भुटानी शरणार्थी प्रकरणमा २ करोड रुपैयाँ ‘डिल’ भएको भनिएको अडियोमा कांग्रेसकी सांसद डा. आरजु राणा देउवाको नाम लिइएको स्वरबारे प्रहरीले परीक्षण गरेको छ । 

प्रारम्भिक परीक्षणमा अडियो रेकर्डमा सुनिएको स्वर हाल मुद्दा पुर्पक्षका लागि जेलमा रहेका दाङका सन्देश शर्मासँग मेल खाएको प्रहरी प्रवक्ता कुवेर कडायतले आइतबार उजुरी छानबिनको प्रगतिबारे जानकारी दिन जारी सूचनामा उल्लेख छ । 

सामाजिक संजालमा आरजु र कांग्रेस नेता बालकृष्ण खाणकी पत्नी एवं सांसद मञ्जु खाणलाई दुई करोड रुपैयाँ बुझाएको भनी नाम लिएको अडियो छानबिनका लागि परेको उजुरीमाथि प्रहरीले ल्याब परीक्षणसहित छानबिन गरिरहेको छ । 

अडियोको परीक्षणका क्रममा ‘कन्ट्रोल स्याम्पल’ ३४ वर्षीय शर्मासँग मेल खाएको प्रवक्ता कडायतले जानकारी दिएका छन् । साथै अडियोको उत्पत्ति (ओरिजिनेट) कहाँ र कसबाट भएको हो भन्ने सम्बन्मा टिकटक सिंगापुरलाई पत्राचार गरिसकेको समेत उनले जनाएका छन् । 

अडियो सार्वजनिक भएपछि मञ्जु सम्पर्कविहीन बनेपछि आरजुले अडियोमा सुनिने स्वरमाथि छानबिन गरी दोषीलाई कारवाहीका लागि अडियो क्लिपसहित गत बैशाख २ मा उजुरी दिएकी थिइन् ।