प्रतिनिधिसभा बैठक बस्न सकेन, भोलि दिउँसाे ३ बजेका लागि बोलाइयो

२४ असार, काठमाडौं । आइतबार पछिल्लो पटक दिउँसो ३ बजेका लागि बोलाइएको प्रतिनिधिसभाको बैठक सूचना टाँसेर असार २५ गते सोमबारका लागि सारिएको छ । 

आइतबार दिउँसो १ बजेका लागि बोलाइएको प्रतिनिधिसभाको बैठक अपरान्ह ३ बजे बस्ने गरी सारिएको थियो । उक्त समयमा पनि बैठक बस्न नसक्ने भएपछि संघीय संसद सचिवालयका महासचिव डा. भरतराज गौतमले सूचना टाँस गरी बैठक सोमबारका लागि सरेको जानकारी दिएका छन् । जारी सूचना अनुसार बैठक भोलि सोमबार सोमबार अपरान्ह ३ बजे बोलाइएको छ ।

प्रधानमन्त्री प्रचण्डले असार १८ गते काठमाडौंमा भारतीय मूलका नागरिक प्रितम सिंहको जीवनीमा आधारित प्रकाशित पुस्तकको विमोचन कार्यक्रममा आफूलाई प्रधानमन्त्री बनाउन सिंह पटकपटक भारतको नयाँ दिल्ली धाएको र नेपालका राजनीतिक दलका नेताहरूसँग बाक्लो भेटवार्ता गरेको भनी दिएको अभिव्यक्तिलाई लिएर प्रचण्डले पदबाट राजीनामा दिनुपर्ने अडान राख्दै एमालेले लगातार रुपमा माथिल्लो सदन राष्ट्रिय सभा आजसहित ४ र प्रतिनिधिसभा बैठक ३ पटक अवरुद्ध पारिसकेको छ । 

तर आज प्रचण्ड, कांग्रेस सभापति शेरबहादुर देउवा र एमाले अध्यक्ष केपी शर्मा ओलीबीच सदन खुलाउनेबारे सिंहदरबारमा बसेको बैठकमा प्रचण्डले सदनमा विवादस्पद अभिव्यक्तिबारे प्रष्टीकरण दिने सहमति जुटेको छ । भोलि बस्ने सदनमा प्रचण्डको जवाफ सुन्न एमाले तयार भएको छ । एमाले संसदमा प्रमुख प्रतिपक्षी दल हुन् ।

एमालेको विरोधमा कारण आज स्थगित भएको संसदको माथिल्लो सदन राष्टियसभाको बैठक पनि भोलि बिहान ११ बजेर १ मिनेटमा बस्ने बोलाइएको छ ।

यो पनि पढ्नुहोस