चंखेलीका तत्कालीन प्रमुख प्रशासकीय अधिकृतसहित ८ जनाविरुद्ध भ्रष्टाचार मुद्दा

२४ असार, काठमाडौैं । हुम्लाको चंखेली गाउँपालिकाका तत्कालीन प्रमुख प्रशासकीय अधिकृत विष्णुबहादुर शाहीसहित ८ जनाविरुद्ध  अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ ।

आर्थिक वर्ष २०७८/७९ मा कर्णाली प्रदेशको मुख्यमन्त्री रोजगार कार्यक्रम अन्तर्गत चंखेली गाउँपालिका–२ मा भएको खानेपानीको ट्यांकी निर्माणमा भएको भ्रष्टाचारमा संलग्नता रहेको भन्दै विशेष अदालत काठमाडौंमा ६ लाख ४८ हजार ७८६ रुपैयाँ बिगोदाबी र कैदसजायको मागसहित मुद्दा दताए गराएको हो । 

शाहीमाथि ट्यांकी निर्माण नै नगरी नापी किताब, कार्यसम्पन्न प्रतिवेदन र उपभोक्ताको बिलमा चढाई बढी मूल्यांकन गरी भुक्तानी दिएको अख्तियारको आरोप लगाइएको छ । गलत तरिकाले गरिएको भुक्तानीबाट राज्यलाई उक्त रकम हानिनोक्सानी पुर्‍याएको अख्तियारको दाबी छ । 

यस्तै चंखेली गाउँपालिकाका इन्जिनियर मानबहादुर ऐडी, प्राविधिक सहायक गोवर्धन बोहरा, लेखापाल नवीन रेग्मी, चंखेली गाउँपालिका–२ का तत्कालीन वडाध्यक्ष हरिहर उपाध्याय, ट्यांकी निर्माण उपभोक्ता समितिका अध्यक्ष गोपाल विश्वकर्मा, सचिव प्रयोगलाल जैसी, कोषाध्यक्ष नन्दादेवी देवकोटा धितालविरुद्ध पनि अख्तियारले भ्रष्टाचार मुद्दा दायर गराएको छ ।