क्षमा पूजाका लागि ओली पशुपति जाने कार्यक्रम छैन्ः सचिवालय

२५ असार, काठमाडौं । नेकपा एमालेका अध्यक्ष केपी शर्मा ओली पशुपतिनाथमा पूजा गर्न जाने भनेर चलाइएको हल्लाप्रति उनको सचिवालयले आपत्ति प्रकट गरेको छ । ओलीको निजी सचिवालयले अध्यक्ष्य ओली पशुपतिनाथको पूजाका लागि जाने कार्यक्रम नरहेको जनाएको छ । 

ओलीका प्रेस संयोजक रामशरण बजगाईले अध्यक्ष ओली पशुपतिनाथमा जाने कुनै कार्यक्रम नरहेको जनाएका हुन । उनले भने, ‘हिजो देखी मैले अध्यक्षको पशुपतिनाथ जाने कुनै कार्यक्रम छैन भनेर भनिरहेको छु, सबैले जाने हो भनेर एकपक्षीय रुपमा लेखिरहेका छन् । आफै जाने भनेर लेख्छन, आफै जाने कार्यक्रम स्थगित भनेर लेखेको देखियो, जबकी तत्काल कुनै कार्यक्रम नै तय भएको थिएन र होइन ।’

कतिपय मिडियाले जलहरी प्रकरणमा क्षमापुजा गर्नका लागि ओली पशुपतिनाथमा जान लागेको भनेर लेखेको भन्दै ओलीको सचिवालयले खण्डन गरेको छ । ओलीले जलहरी सुन काण्डको क्षमाका लागि पुजाआजा गर्ने कार्यक्रम नरहेको सचिवलयको भनाइ छ ।