तेस्रो दिन पनि कोशी प्रदेश सरकारविरुद्धको रिट हेर्न नभ्याइनेमै राखियो

२६ असार, काठमाडौं ।  सर्वोच्च अदालतमा कोसी प्रदेश सरकार विरुद्धको रिट आज पनि हेर्न नभ्याइनेमा परेको छ ।  न्यायाधीश तिलप्रसाद श्रेष्ठको इजलासमा परेको उक्त रिट बिहानै हेर्न नभ्याइने भन्दै स्थगित भएको छ ।

यसअघि, दुई पटक सुनुवाइ तोकिएको भए पनि हेर्न नभ्याउने हुँदै स्थगित भएको हो । बिहीबार सभामुख समेतलाई जोडेर सरकार गठन गरिएपछि नेकपा एमालेका तर्फबाट रिट दायर गरिएको थियो ।

कोसीका निर्वतमान मुख्यमन्त्री तथा एमाले संसदीय दलका नेता हिक्मतकुमार कार्कीले संविधान विपरीत सरकार गठन भएको भन्दै रिट दायर गरेका हुन् । रिटमा हालै नियुक्त भएका मुख्यमन्त्री उद्धव थापा, प्रदेश प्रमुख पर्शुराम खापुङ र प्रदेश सभामुख बाबुराम गौतमलाई विपक्षी बनाइएको छ ।