मनाङ एयर हेलिकप्टर दुर्घटना: पाइलट प्रेसरमा परेको आशंका

२९ असार, काठमाडौं । मंगलबार बिहान सोलुखुम्बुबाट काठमाडौंका लागि उडेको मनाङ एयरको हेलिकोप्टर उडेको केहीबेरमै सोलुखुम्बुको लिखुपिके गाउँपालिका- ५ लामजुरामा दुर्घटनाग्रस्त अवस्थामा भेटियो ।दुर्घटनामा परी हेलिकोप्टरमा सवार सबै ६ जनाको मृत्यु भएको छ।

हेलिकोप्टर पाइलट चेतबहादुर गुरूङसँगै हेलिकोप्टरमा सवार मेक्सिकोका नागरिकहरू फर्नान्डो सिफुग्नेट्स, रिनकन इसमाइल, एबरिका गोन्जालेक्स, ओलासियो गोन्जालेज र मारिया होजे सिफुन्तेसको पनि मृत्यु भएको छ।

मनाङ हेलिकोप्टरका सञ्चालक मुक्ति पाण्डेका अनुसार चेतबहादुर गुरूङ सिनियर एवं अनुभवी पाइलट हुन्। ५४ वर्षीय गुरूङ मनाङ एयरको फ्लाइट सेफ्टीको समेत जिम्मेवारीमा थिए । 

हेलिकोप्टर दुर्घटनापछि सरकारले दुर्घटनाको कारण पत्ता लगाउन छानविन समिति गठन गरेको छ भने सबै हेलिकोप्टरको उडान कार्यमा कडाइका साथ नियमन गर्ने बताएको छ । तर, अधिक नियमनबाट मात्र हवाई दुर्घटनामा कमी आउन सम्भव नरहेको दावी गर्दै विज्ञ तथा जानकारले पाइलट प्रेसरमा परेकै कारण मनाङ एयरको हेलिकप्टर दुर्घटनामा परेको दावी गरेका छन् ।

एक हवाई विज्ञका अनुसार हवाई दुर्घटना नियमनकारी निकायले चाहिने भन्दा बढी नियमनको प्रावधानले हवाई दुर्घटना न्यूनीकरण हुन्छ भन्ने मान्यता सधै सत्य नहुन सक्दछ । मनाङ एयरको हालै दुर्घटनामा परेका पाइलट क्याप्टेन चेत बहादुर गुरुङको हेलिकोप्टर उडानको सिलसिलामा मे महिनामा एक दिन इन्जिनियरबाट नियमित दैनिक चेकजाँच गरेको हेलिकोप्टरको चेकजाँचको म्याद २४ घन्टा बढी जम्मा १ घन्टा गुजारेकै कारण ३१ मे २०२३ देखि १८ जुन २०२३ सम्म ग्राउन्डेड भएर नेपाल नागरिक उड्डयन प्राधिकरणको कारबाहीमा परेका थिए ।

दुर्घटनाग्रस्त हेलिकोप्टर पनि दुर्घटनाको अघिल्लो दिन काठमाडौंको इन्जिनियरले चेकजाँच गरी अघिल्लो दिन करिब १२ बजे काठमाडौंबाट उडेको थियो । दुर्घटना भएको दिनको मध्याह्न १२ बजे अगाडि नै इन्जिनियरले गरेको चेक जाँचको म्याद सकिने भएकाले पनि पाइलटले प्रेसरमा जहाज उडाएको आशंका पाइलट तथा जानकारहरुले गरेका छन् ।