समाचार प्रभाव: "हाउसमेड" मा कुवेत जान हिँडेका महिलासहित ११७ जना विमानस्थलबाट फर्काइए

२९ असार, काठमाडौं । अध्यागमन विभागले श्रम स्वीकृति नै लिएर कुवेतका लागि वैदेशिक रोजगारीमा जान लागेका ११७ जना श्रमिकलाई विमानस्थलबाट फर्काइदिएको छ । बुधबार कुवेत जानको लागि विमानस्थल पुगेका यात्रुहरू मध्ये आधा जसो महिला कामदार थिए । भिसा शंकास्पद रहेको भन्दै अध्यागमन कार्यालयले बुधबार साँझ सलाम एयरमार्फत कुवेत जान लागेका १०१ जना र बिहीबार बिहान कुवेत एयरमार्फत कुवेतमा जान लगेका १६ जना श्रमिकलाई विमानस्थलबाट फर्काएको हो ।

उनीहरूलाई 'हाउसमेड'का रुपमा पठाउन खोजिएको थियो । श्रम स्वीकृति कामदारका रुपमा लिइएको र झोलामा 'हाउसमेड'का रुपमा काम गर्ने कागजात भेटिएपछि भिसा नै शंकास्पद मान्दै उनीहरू सबैलाई विमानस्थलबाट फर्काइएको विभागका महानिर्देशक झलकराम अधिकारीले जानकारी दिए ।

"मेनपावर र दलालको अवैद्य धन्दाः महिलालाई “हाउसमेड” भन्दै बच्चा जन्माइदिन पठाउने गरेको खुलासा"  शीर्षकमा नेपालबहसले यस सम्बन्धी विस्तृत समाचार प्रकाशन गरेपछि अध्यागमनको ध्यान त्यतातर्फ केन्द्रीत भएको थियो ।

"हाउसमेड"का रुपमा महिला कामदार पठाउन कार्यविधि केही झण्झटिलो र कामदारको सुरक्षाको जिम्मेवारी रोजगारदाताले लिनु पर्ने नियम भएकाले विदेशी एजेन्टको इशारामा नेपालका मेनपावरले यसरी कामदारका रुपमा पठाउने र काम भने अर्कै लगाउने गर्दै आएका थिए ।

स्रोतका अनुसार इन्डेक्स म्यानपावरबाट ४७, युथ म्यानपावरबाट ३२ र निलकलम एचआरबाट २४ जना, सुलभ म्यानपावरमार्फत ४ जना श्रमिकले कुवेतको भिसा लगाएर श्रम स्वीकृति पाएका थिए ।

अहिले आधा दर्जन मेनपावर कम्पनीबाट 'हाउसमेड'का रुपमा पठाइएका कामदारलाई फर्काइएको भए पनि यस्तो धन्दामा अन्य थुप्रै मेनपावर कम्पनी संलग्न रहेको बताइन्छ । खासगरी मेनपावरको धन्दा गर्दै दलीय राजनीतिमा पनि संलग्न भएका आफूलाई पावरफूल सम्झने 'मानवतस्कर'हरु यस्तो गैर धन्दामा सक्रियतापूर्वक लागिरहेका छन् । यसबारे सुक्ष्म अनुसन्धान गरी त्यस्ता धन्दामा संलग्न हुनेहरूको वास्तविक अनुहार बाहिर ल्याउनै पर्छ ।