एमालेले धुपबत्ती बाल्दैमा सत्ता गठबन्धन र सरकार तलमाथि हुँदैनः मन्त्री ज्वाला

३१ असार,  जनकपुरधाम । भौतिक पूर्वाधार तथा यातायात मन्त्री प्रकाश ज्वालाले एमालेको चाहनाले सत्ता गठबन्धन नभत्कने र सरकार परिवर्तन पनि नहुने बताएका छन् । उनले अहिलेको सत्ता गठबन्धन बलियो भएकाले कसैले चाहँदैमा नढल्ने बताएका छन् । आइतबार जनकपुरधाममा मन्त्री ज्वालाले सञ्चारकर्मीसँग यस्तो बताएका हुन् ।

उनले नेकपा एमालेप्रति लक्षित गर्दै गठबन्धन ढलोस् भनेर कसैले धूप बत्ती बाल्दैमा नढल्ने टिप्पणी गरे । प्रतिगमनका विरुद्धमा एकजुट भएर सडकदेखि अदालतसम्म लडेका शक्तिहरू एक ठाउँमा रहेको उल्लेख गर्दै उनले गठबन्धन ढाल्ने सपना नदेख्न आग्रह गरे ।
 
उनले भने, ‘अहिलेको गठबन्धन बलियो धरातलमा उभिएको छ । यो कसैले गठबन्धन ढलोस् भनेर चाहँदैमा, धूपबत्ती गर्दैमा गठबन्धन ढल्दैन । किनभने, यसको ग्राउन्ड छ । प्रतिगमनका विरुद्धमा एकजुट भएर सडकदेखि अदालतसम्म लडेका शक्तिहरू छन् ।’ 

उनले चुनावका बेलामा सँगै अघि बढेका शक्तिहरू एक ठाउँमा रहने र जटिल मोडहरुमा एकताबद्ध भएका शक्तिहरू एक ठाउँमा नै रहने बताए । यो ढलेर फाइदा पाइहाल्छाैं कि भनेर आशावादी भएकाहरूको आशा पूरा नहुने उनको भनाइ छ । मन्त्री ज्वालाले समाजवादी मोर्चा सरकार बलियो बनाउने र टिकाइरहने मात्र नभइ गठबन्धनको दीर्घकालीन फाइदाका लागि बनेको जिकिर गरे ।