आगामी भदौ २८ गतेसम्ममा सम्पत्ति विवरण सांसदहरुलाई बुझाउन आग्रह

३१ असार, काठमाडौं । संघीय सांसदहरूले साउन १ गतदेखि भदौ २८ गतेभित्रसम्ममा सम्पत्ति विवरण बुझाउनुपर्ने भएको छ ।  संसद् सचिवालयले सूचना निकालेर सांसदहरूलाई आर्थिक वर्ष २०७९/०८० को सम्पति विवरण बुझाउन आग्रह गरेको छ । 

भ्रष्टाचार निवारण ऐन २०५९ र अख्तियार दुरुपयोग अनुसन्धान आयोग ऐन २०४८ मा संघीय सांसदले आर्थिक वर्ष समाप्त भएको ६० दिनभित्र सम्पत्त विवरण बुझाउनुपर्ने व्यवस्था छ ।  

सोही व्यवस्थाअनुसार सचिवालयले सांसदहरूलाई सम्पत्ति विवरण बुझाउन सूचना निकालेर आग्रह गरेकाे छ । सम्पत्ति विवरण बुझाउँदा सांसदले आफ्नो र आफ्नो परिवारको नाममा रहेको सम्पत्तिको स्रोत वा निस्सा स्पष्ट उल्लेख गरी पेस गर्नुपर्ने सूचनामा भनिएको छ । यसका लागि संसद सचिवालयले आगामी भदौ २८ गतेसम्मको समय तोकेको छ ।

साउन १ गतेदेखि मिति २०८० भाद्र २८ गतेसम्म आर्थिक वर्ष २०७९/०८० को लागि आफ्नो र आफ्नो परिवारको नाममा रहेको सम्पत्तिको स्रोत वा निस्सासहितको अद्यावधिक सम्पत्ति विवरण भरी सिलबन्दी खाममा देहायो विवरणहरु समेत स्पष्ट उल्लेख गरी संघीय संसद सचिवालयको सांसद सुविधा व्यवस्थापन शाखा मा दर्ता गराउनुहुनु निर्देशानुसार यो सूचना प्रकाशन गरिएको छ’ सचिवालयले जारी गरेको सूचनामा उल्लेख छ ।