त्रिभुवन विमानस्थलको भन्सार प्रमुखबाट हटाइए पोखरेल, अर्थ मन्त्रालयले पाण्डेलाई दियो जिम्मेवारी

९ साउन, काठमाडौं । अर्थ मन्त्रालयले त्रिभुवन अन्तर्राष्ट्रिय विमानस्थल भन्सार कार्यालयको जिम्मेवारीमा सहसचिव टोकराज पाण्डेलाई पठाएको छ । दुई महिनादेखि विदामा रहेका अरुण पोखरेललाई हटाएर  पाण्डेलाई लगिएको हो । 

विमानस्थलबाट क्विन्टल सुन तस्करीपछि अर्थ मन्त्रालयले सहसचिव विमानस्थलको भन्सार प्रमुखकाे जिम्मेवारी दिएकाे अर्थ मन्त्रालयका प्रवक्ता धनीराम शर्माले जानकारी दिएका छन् । पाण्डे आइतबार मात्रै राष्ट्रिय किताब खानाको महानिर्देशकबाट अर्थ मन्त्रालयमा सरुवा भएका थिए ।   

१० पुस, २०७९ मा विद्युतीय चुरोटमा राखेर विमानस्थलबाट साढे ९ किलो सुन तस्करी भएको प्रकरणमा अनुसन्धान सुरु भएपछि पोखरेल बिदामा बसेका थिए । पोखरेल बिदामा रहेकै बेला ३ साउनमा विमानस्थल पार गरेर करिब एक क्विन्टल सुन सिनामंगलबाट राजस्व अनुसन्धान विभागले बरामद गरेको थियो । अहिले यसको अनुसन्धान भइरहेको छ ।