गृहमन्त्रीको जवाफ हेरेर थप कदम चाल्ने एमालेको निर्णय, सत्ताधारीले देश लुटेको ओलीको आरोप

१० साउन, काठमाडौं । प्रमुख प्रतिपक्षी नेकपा एमालेले अवैध ढंगले भएको सुन आयात प्रकरणमा उपप्रधान तथा गृहमन्त्री नारायणकाजी श्रेष्ठले संसदमा दिने जवाफलाई हेरेर थप कदम उठाउने भएको छ । उसले गृहमन्त्रीमाथि नैतिक प्रश्न गर्ने निर्णय पनि  गरेको छ । नयाँ बानेश्वरस्थित संसदको लोत्से हलमा बसेको एमाले संसदीय दलको बैठकले गृहमन्त्रीमाथि नैतिक प्रश्न गर्ने र जवाफ माग गर्ने निर्णय गरेको हो ।

बैठकमा सशक्त ढंगले अगाडि बढ्ने, सुन प्रकरणमा गृहमन्त्रीमाथि नैतिक प्रश्न गर्ने, छानबिनको माग गर्ने, जवाफ माग्ने निर्णय भएको छ । तथ्यगत रिपोर्ट के हो जवाफ माग्ने नै मुख्य निर्णय भएको एमाले नेता रघुजी पन्तले बताए । एक क्विन्टल सुन अवैध रुपमा आयात गर्ने कम्पनीले यसअघि पनि पटक–पटक सामान ल्याएको देखिएको उल्लेख गर्दै त्यसबारे पनि छानबिन हुनुुपर्ने एमालेको माग रहेको छ । 

कसले सुन ल्याएको हो दोषी पत्ता लगाउनुपर्ने र कानुनी कारबाही गर्नुपर्ने आफ्नो पार्टीको निर्णय भएको उनले जानकारी दिए । गृहमन्त्रीको जवाफ कस्तो आउँछ त्यस आधारमा एमालेले थप कदम चाल्ने पनि उनले बताए । बैठकमा अध्यक्ष केपी शर्मा ओलीले सत्ताधारी दलले देश लुटिरहेका अवस्थामा एमाले चुप लागेर बस्न नहुने बताएका थिए । 

ओलीले सत्ताधारी दलले देश लुटिरहेको आरोप लगाउँदै सत्तारुढ दलले नांगो नाच देखाइरहेकाले एमाले चुप लागेर बस्न नहुने भन्दै त्यसअनुसार अगाडी जान सांसदहरुलाई निर्देशन दिएका थिए । बुधबार एमाले संसदीय दलको बैठकलाई सम्बोधन गर्दै अध्यक्ष ओलीले उक्त कुरा बताएका हुन् ।