अदालतले १० हजार धरौटीमा रिहा गर्न आदेश दिएका गुण्डा नाइके सानुभाइ फेरी कारागार चलान

१० साउन, काठमाडौं । जिल्ला अदालत काठमाडौंले १० हजार धरौटीमा छोड्न आदेश दिएपनि गुण्डा नाइकेका रुपमा चिनिएका सानुभाइ उर्फ युवराज गुरुङलाई प्रहरीले पुरानो मुद्दा बाँकीरहेको भन्दै कारगार पठाएको छ । 

जिल्ला अदालत, काठमाडौंले अभद्र व्यवहारको कसूरमा उनलाई १० हजार रुपैयाँ धरौटी राखेर छाड्न आदेश दिएको थियो । जिल्ला प्रहरी परिसर, काठमाडौंका डीएसपी अनिल अधिकारीका अनुसार अदालतले छाड्न आदेश दिए पनि उनले पुरानो मुद्दामा कैद भुक्तान गर्न बाँकी रहेको देखिएकाले कारागार पठाइएको हो । 

उनी काठमाडौं–२६, ठमेलस्थित क्लब ओम्नियामा गएर सञ्चालक राजेन्द्र गुरुङसहित अरु कर्मचारीहरुलाई कुटपिट गरेको आरोपमा पक्राउ परेका थिए । उनका समूहका अरु ६ जनालाई मंगलबार नै जिल्ला प्रशासन कार्यालय, काठमाडौंले ८ हजार रुपैयाँ धरौटीमा छाड्न आदेश दिएको थियो ।

अदालतको आदेशपछि एउटै कसूरमा पक्राउ परेका रघु तामाङ, विनोद तामाङ, कमल तामाङ, निरु भनिने निरज गुरुङ, विश्व तामाङ र विक्रम अधिकारी मंगलबारै छुटेका छन् । डीएसपी अधिकारीका अनुसार, सानुभाइ अभद्र व्यवहारमा पटकपटक पक्राउ परिसकेका व्यक्ति भएका उनको मुद्दा अदालतमा पेश गरिएको हो ।

१५ असारमा क्लब बसिरहेका बेला आफूमाथि राति २ बजे कुटपिट भएको भन्दै सञ्चालक गुरुङले प्रहरी कहाँ किटानी जाहेरी दिएका थिए । भर्खरै सञ्चालन गरेको क्लबमा गुरुङले विभिन्न नाममा रकम माग्दै धम्क्याउने गरेको उनको आरोप थियो ।