बेंसीशहर बजारका अव्यवस्थित तार हटाउन नगरपालिकाको निर्देशन

१२ साउन, लमजुङ । बेंसीशहर नगरपालिकाले बजार क्षेत्रमा रहेका अव्यवस्थित र प्रयोगमा नआएका केवल नेटवर्किङका तारहरु हटाउन सम्बन्धित संस्थालाई १५ दिने सूचना जारी गरेको छ ।

नगरपालिकाले अव्यवस्थित तारहरुले बजारको सौन्दर्यमा समस्या ल्याएको तथा मङ्गलबारका दिन देखि १५ दिनको म्याद दिएको हो ।

प्रमुख दलको सहभागितामा बसेको बैठकले अव्यवस्थित तारहरु हटाउने निर्णय गरेको हो । बैठकमा भएको सोही निर्णय अनुसार बेसी सहर नगरपालिकाको बजार क्षेत्रमा रहेका बिजुली तथा टेलिफोनका पोलमा अव्यवस्थित रुपमा रहेका पुराना तथा प्रयोगमा नआएका केवल तथा नेटवर्किङका तारहरुलाई १५ दिन भित्र हटाउन सम्बन्धित सबैमा सूचित गरिएको नगरपालिकाका प्रमुख प्रशासकीय अधिकृत इमानाथ कंडेलले जानकारी दिएका छन् ।

यस सूचना पश्चात् अव्यवस्थित तारहरु व्यवस्थापनको कार्य सुरु हुने भएकोले यदि कोही कसैको विवरण नखुलेका तार तथा केवलहरु छुट्न गएमा वा काटिएमा सम्बन्धित संस्था वा व्यवसाय स्वयं जिम्मेवार हुने नगरपालिकाले जनाएको छ । नगरपालिकाको हामी सबैको रहर सभ्य समृद्ध बेंसीशहर भन्ने नारा समेत रहेको छ ।

सदरमुकाम बेसीशहरमा अव्यवस्थित तारहरुको जालोहरु जताततै रहेको देखिन्छ । बेंसीशहरसहित जिल्लाका अधिकांश बजार क्षेत्रमा तार व्यवस्थापन एक चुनौतिका रुपमा रहेको पाइन्छ ।