बुढाहरुले व्यवस्था परिवर्तन गरे, युवाले अवस्था परिवर्तन गर्नुपर्छ: अध्यक्ष तिमिल्सिना

 १२ साउन, काठमाडौं । राष्ट्रियसभाका अध्यक्ष गणेशप्रसाद तिमिल्सिनाले वर्तमान राजनीतिक नेतृत्व मुलुकको व्यवस्था परिवर्तन गर्न सफल भएपनि अवस्था परिवर्तन गर्न अलमलिएको बताएका छन् । उनले यसअघिका राजनीतिक नेतृत्वले संघीय लोकतान्त्रिक शासन व्यवस्था ल्याउन महत्वपूर्ण योगदान दिए पनि नेपाली जनताको अवस्था परिवर्तन गर्न नसकेको बताए । 

योङ प्रोफेसनल फेलोसिप नेपाल–२०२३ ले शुक्रबार ललितपुरमा आयोजना गरेको एक कार्यक्रममा उनले आफूहरू र त्यसभन्दा अघिल्लो पुस्ताको जीवन मुलुकको व्यवस्था परिवर्तनको आन्दोलनमा बितेको उल्लेख गर्दै युवा पुस्ताले मुलुकको अवस्था परिवर्तनको जिम्मेवारी लिनुपर्ने बताए । उनले युवा पुस्तालाई नेतृत्वदायी भूमिकामा ल्याउन आफूले पहलकदमी लिँदै आएको जिकिर गरे । 

अध्यक्ष तिमिल्सिनाले विश्वले चाहेको परिवर्तनको संवाहक युवा पुस्तालाई बनाउने काममा उत्प्रेरकको भूमिका निर्वाह गराउने काममा सबैको साथ र सहयोग आवश्यक रहेको बताए । उनले अब बुढो पूस्ताले युवा पूस्तालाई जिम्मेवारी दिएर मुलुको अवस्था परिवर्तनमा लगाउनुपर्ने बताए ।