बालुवाटारमा ओली–प्रचण्डबीच छलफल

१४ साउन, काठमाडौं । नेकपा एमालेका अध्यक्ष केपी शर्मा ओली र प्रधानमन्त्री पुष्पकमल दाहाल 'प्रचण्ड'बीच बालुवाटारमा छलफल भएको छ । प्रमुख तीन दलका शीर्ष नेताको छलफल सकिए लगत्तै ओली बालुवाटर पुगेका थिए । प्रधानमन्त्री प्रचण्ड र एमाले अध्यक्ष ओलीबीच बालुवाटारमा संसद अवरोध खुलाउने र कोशी प्रदेश सरकार विस्तारबारे छलफल भएको बताइएको छ । 

त्रिभुवन अन्तर्राष्ट्रिय विमानस्थलबाट बाहिरिएको झण्डै सय किलो सुन काण्डको विषयलाई लिएर गत बिहिबार प्रतिनिधि सभाको बैठकमा हंगामा मच्चिएपछि प्रतिनिधिसभाको बैठक साउन १५ गते बस्ने गरी स्थगित भएको थियो । बिहिबार बसेको बैठकमा सुन तस्करी प्रकरणमा उच्चस्तरीय छानबिन समिति बनाउन माग गर्दै अधिकांश सांसदहरूले बैठक अवरोध गरेपछि बैठक साउन १५ गतेसम्मका लागि स्थगित गरिएको थियो ।

एमाले अध्यक्ष ओली बालुवाटार पुग्नुअघि प्रधानमन्त्री प्रचण्डले कोशी प्रदेश सरकार गठनबारे सत्ता गठबन्धनको शीर्ष नेताहरूसँग छलफल गरेका छन् । कोशी सरकार गठनबारे छलफल गर्न कांग्रेस सभापति शेरबहादुर देउवा, एकीकृत समाजवादीको नेता माधव कुमार नेपाल लगायतका नेता बिहानै बालुवाटार पुगेका थिए । देउवा र नेपाल बालुवाटारबाट बाहिरिएसँगै ओली र प्रचण्डबीच वान टू वान वार्ता सुरु भएको हो ।