कोशीमा कांग्रेसलाई अलग राखेर सरकार बनाउने कसरत

१५ साउन, काठमाडौं । बहुमतसहित सरकारको दावी गर्न एक दिनको समय बाँकी रहेका बेला कोशी प्रदेशमा कसको नेतृत्वमा सरकार बन्ने भन्ने अन्योल कायमै छ । केन्द्रमा सत्ता गठबन्धनबीच नै कुरुा मिलिरहेको छैन् । नेपाली कांग्रेस राप्रपालाई मनाएर आफ्नो नेतृत्वमा सरकार बनाउने कसरतमा छ भने माओवादी लगायतका दलहरु कांग्रेसलाई बाहिर राखेर बामपन्थी नेतृतवमा सरकार बनाउने कसरतमा लागेका छन् । 

सत्तारुढ दलबीचमा कसको नेतृत्वमा कसरी सरकार बनाउने भन्नेमा सहमति नजुट्ने भएपछि नेकपा माओवादीका केही नेताहरु एमालेसँग मिलेर गैर कांग्रेस सरकार बनाउने भित्रि रणनीतिमा जुटेका छन् । सबै दललाई कोशीमा सरकार बनाउन जटिल बन्दै गएको छ । प्रदेश प्रमुखले मंगलबार साँझ ५ बजेभित्र दाबी पेस गरिसक्नु पर्ने समय तोके पनि दलहरुको प्रयास सार्थक बन्न सकेको छैन ।

प्रदेश प्रमुख पर्शुराम खापुङले नेपालको संविधानको धारा १६८ उपधारा २ बमोजिम सरकार गठनमा दाबी पेस गर्न प्रमुख राजनीति दलहरुलाई आह्वान गरेका छन् । यो धारामा दुई वा दुईभन्दा बढी दलले बहुमत पु¥याएर सरकार गठनको लागि दाबी पेस गर्नुपर्ने व्यवस्था छ । तर, अघिल्लोपटक सभामुखसमेतको हस्ताक्षर पेस गरी गठन भएको सरकारलाई सर्वोच्च अदालतले बदर गरिदिएपछि कसरी बहुमत पुर्याएर दाबी गर्ने भन्नेमा सत्ता गठबन्धन अन्योलमा छ ।

गठबन्धन दलका नेपाली कांग्रेस, नेकपा माओवादी केन्द्र, नेकपा एकीकृत समाजवादी र जनता समाजवादी पार्टी (जसपा) बहुमत पुर्याउने विधिको विषयमा केन्द्रीयस्तरमै छलफलमा छन् । तर, के कसरी यो सम्भव गर्ने भन्ने निक्र्योलमा भने पुगिसकेको अवस्था छैन । यसैलाई टेकेर कोशी प्रदेशमा सरकार गठनका लागि माओवादीको एउटा समूह सर्वदलीय सरकारको प्रयासमा जुटेको छ । कोशीका सभामुख बाबुराम गौतमलाई राजीनामा गराएर बहुमत दाबी गर्ने तयारीमा रहेको सत्ता गठबन्धनलाई माओवादीभित्रैबाट काउन्टर दिनेकाम भएको छ । 

माओवादी नेता वर्षमान पुनले सर्वदलीय सरकार गठन नभएसम्म कोशीमा मध्यावधि नटर्ने भन्दै आन्तरिक र बाह्य छलफल सुरु गरेका छन् । सभामुखले राजीनामा दिएर सत्ता गठबन्धनको सरकार बने पनि यो दिगो हुन नसक्ने उनको निष्कर्ष छ । वर्षमान निकट स्रोतका अनुसार कोशी प्रदेशको स्थायित्वका लागि सर्वदलीय सरकार आवश्यक छ । सकेसम्म वामपन्थी नेतृत्वमा बन्दा त्यो दिगो हुन्छ ।’

वामपन्थीको नेतृत्वमा कोशीमा प्रदेश सरकार गठन गर्नुपर्ने विषयमा उनले अध्यक्ष प्रचण्डसँग पनि लविङ गरिरहेका छन् । कोशीका पूर्वमुख्यमन्त्री हिक्मत कार्कीसँग पनि पुनको भेटघाट भएको बुझिएको छ । एमाले संसदीय दलका नेता कार्कीले पनि सर्वदलीय सरकारको कुरा उठाउँदै आएका छन् । उनले असार १४ गतेको कोशी प्रदेशसभाको बैठकमा सर्वदलीय सरकारका लागि आह्वान गरेका थिए ।